ماسكتىڭ قايىرىمدىلىققا ناقتى قانشا اقشا جۇمساعانى بەلگىسىز.
2021 جىلى Tesla باس ديرەكتورى يلون ماسك شامامەن 5،7 ملرد دوللارلىق كومپانيا اكسيالارىن قايىرىمدىلىققا جىبەرگەن. مۇندا مالىمەت اقش رەتتەۋشىلەرىنە جىبەرىلگەن، دەپ حابارلايدى Almaty-akshamy.kz Interfax.ru cىلتەمە جاساپ.
قۇجاتتاردا 5 000 044 اكسيالارىن ناقتى كىم العانى كورسەتىلمەگەن.
قايىرىمدىلىق شارالارى Tesla اكسيالارىن ساتۋ بارىسىندا ىسكە اسقان. جالپى العاندا، ماسك 2021 جىلدىڭ سوڭعى ەكى ايىندا 16 ملرد دوللاردان استام كومپانيا قاعازىن ساتقان. ول سونداي-اق وتكەن جىلى شامامەن 22،9 ملن وپسيوندى اكسياعا اينالدىرعان.
Tesla باسشىسى جەلتوقساندا، ياعني قايىرىمدىلىق جاساعاننان كەيىن بىرنەشە اپتا وتكەن سوڭ، 2021 جىلعا 11 ملرد دوللاردان استام سالىق تولەۋى كەرەك دەپ ساناعان.
Chronicle of Philanthropy باسىلىمىنىڭ مالىمەتتەرى بويىنشا، ماسك 2021 جىلى قايىرىمدىلىققا اقشا جۇمساۋ جاعىنان ەكىنشى ءىرى مەسەنات بولدى. بيلل مەن مەليندا گەيتس جالپى سوماسى 15 ملرد دوللارلىق قايىرىمدىلىق جاساپ، الدىڭعى قاتاردا تۇر.
ماسكتىڭ قايىرىمدىلىققا ناقتى قانشا اقشا جۇمساعانى بەلگىسىز، ءبىراق Tesla باسشىسى بۇل تۋرالى كەيدە الەۋمەتتىك جەلىلەردە حابارلاپ تۇرادى. 2021 جىلدىڭ ناۋرىزىندا ول تۆيتتەردە تەحاستاعى مەكتەپتەرگە 20 ملن دوللار جانە قالا ورتالىعىن قالپىنا كەلتىرۋ ءۇشىن 10 ملن دوللار بولەتىنىن جازعان بولاتىن. 2018 جىلى ول Tesla كومپانياسىنىڭ 100 ملن دوللاردان استام اكسياسىن قايىرىمدىلىق رەتىندە ساتقانىن حابارلاعان.