الماتىداعى بوتانيكالىق باقتا جىلدار بويى باپتاپ كەلگەن، سيرەك كەزدەسەتىن، ءجۇز ءتۇرلى تروپيكالىق وسىمدىك بيىل قىستا ءۇسىپ قالدى. سەبەبى، جىلىجايدىڭ كۇردەلى جوندەۋ جۇمىستارى اياقتالماعان. ەكى جىل بۇرىن باستالعان نىساننىڭ قۇرىلىسى بيىل دا توقتاپ تۇر.
بيىل ورانجەرەيا 20 گرادۋس ايازدا اشىق قالعان، دەپ حابارلايدى Almaty-akshamy.kz.
ماماندار تروپيكالىق وسىمدىكتەر مۇنداي تەمپەراتۋراعا بەيىمدەلمەگەنىن ايتادى. ولار بىلتىر التى اي قىستا تەك قاڭقاسى تۇرعىزىلىپ، جان-جاعى قاڭىراپ قالعان جىلىجايدى كۇن سايىن وزدەرى جىلىتىپ، وسىمدىكتەردى ساقتاپ قالۋعا تىرىستىق، دەيدى.
شولپان ءمۇرساليموۆا، تروپيكالىق جانە سۋبتروپيكالىق وسىمدىكتەر زەرتحاناسىنىڭ مەڭگەرۋشىسى:
ورانجەرەيا قۇرىلىسى باستالعان كەزدە ءبىزدىڭ كوللەكسيامىزدا 500-دەن استام وسىمدىك ءتۇرى بولعان. ءقازىر 100-دەن استامى ءۇسىپ قالدى. ولاردىڭ ىشىندە 60-80 جىلدىق وسىمدىكتەر دە بار. ەندى ولاردى قالپىنا كەلتىرە المايمىز. كەيبىرەۋلەرىنىڭ تۇقىمى كوللەكسيالىق قوردا بار. ال جەردە تۇرعان وسىمدىكتەر امان قالدى، بيىك وسكەندەرى سۋىققا شىدامادى.
نىساندى قايتا جوندەۋ جۇمىستارى «SHAK» كومپانياسىنا بەرىلگەن. ءتولقۇجاتقا سايكەس، قۇرىلىس 2022 جىلى باستالىپ، ءبىر جىلدان سوڭ اياقتالۋى كەرەك ەدى.
گۇلنار سيتپايەۆا، «بوتانيكا جانە فيتوينترودۋكسيا ينستيتۋتى» رمك باس ديرەكتورى:
ورانجەرەيانى جوندەۋ جۇمىستارىنا 1 ملرد 43 ملن تەڭگە ءبولىندى، ونىڭ 500 ملن-عا جۋىعى يگەرىلدى، قالعانى بيۋدجەتتە قالدى. قۇرىلىس كومپانياسى جىلىجايدى ۋاقىتىندا تاپسىرماعان سوڭ، ءبىز سوتقا بەردىك. سوت شەشىمى بويىنشا ولارعا نىساننىڭ جۇمىسىن اياقتاۋ مىندەتتەلدى.
ال «Shak» مەردىگەر كومپانياسىنىڭ وكىلدەرى «قۇرىلىس ماتەريالدارى قىمبات، ال بولىنگەن قارجى جۇمىستى تولىقتاي اياقتاۋعا جەتپەيدى» دەپ قىسقا قايىردى.
ۆلاديمير كوپىلوۆ، «Shak» قۇرىلىس كومپانياسىنىڭ وكىلى:
بيۋدجەتتەن بولىنگەن قارجى از. ءبىز قايتا جوبالىق سمەتا جاساپ جىبەردىك، الايدا، اقشا قاراستىرىلمايتىنىن ايتتى.ءبىز ينۆەستور تارتۋعا بارىنشا تىرىستىق. الايدا «Shak» كومپانياسى قارا تىزىمدە تۇر.
ال بوتانيكالىق باقتىڭ زاڭگەرى، ەگەر مەردىگەردى قايتا تاڭدايتىن بولساق، بۇل پروسەسس ۇزاق ۋاقىتتى الۋى مۇمكىن، دەيدى.
ەرىك تويجانوۆ، «بوتانيكا جانە فيتوينترودۋكسيا ينستيتۋتى» رمك زاڭگەرى:
ەندىگى جۇمىستار، دەمەۋشى تابىلسا، سول ءوز اقشاسىنا مىنا وبەكتىنى اياقتاپ بەرسە، باسقا قۇرىلىس كومپانياسىن جالداپ، ءبىز مەملەكەت ارقىلى الساق. بىرىنشىدەن كوپ ۋاقىت كەتەدى، ەكىنشىدەن ءبىزدىڭ سمەتالىق قۇجاتتامامىز 3 جىل ءوتىپ كەتتى، ونى قايتادان ءبىز جاساۋىمىز كەرەك، قايتادان ەكسپەرتيزادان وتكىزۋىمىز كەرەك.
تامىز ايىنا دەيىن دەمەۋشى كومپانيا تابىلسا، جىلىجايدىڭ قۇرىلىس جۇمىسى باستالادى. ءبىراق جوبا وتە كۇردەلى، تاجىريبەلى مامانداردى قاجەت ەتەدى، سونداي-اق، تاعى قانشا جىلعا سوزىلارى بەلگىسىز. ال مۇنداعى سيرەك كەزدەسەتىن وسىمدىكتەردىڭ الداعى قىستان امان شىعارىنا ەشكىم كەپىل بەرمەيدى.