الماتى اكىمى ەربولات دوسايەۆ جۇمىس ساپارى بارىسىندا «نارحوز» ۋنيۆەرسيتەتىنە بارىپ، Narxoz Housing جاڭا جاتاقحاناسىنىڭ قۇرىلىسىمەن تانىستى.
جاتاقحانا قۇرىلىسى ۋنيۆەرسيتەت اۋماعىندا اكسيونەردىڭ ءوز قاراجاتى ەسەبىنەن جۇرگىزىلۋدە. ءقازىر جۇمىستار 80%-عا ورىندالدى. قۇرىلىستىڭ اياقتالۋى اعىمداعى جىلدىڭ تامىز ايىنا جوسپارلانعان، جاتاقحانا جاڭا وقۋ جىلىندا پايدالانۋعا بەرىلەدى.
قالا باسشىسى ستۋدەنتتەردىڭ ءومىر ءسۇرۋى مەن وقۋى ءۇشىن قولايلى جاعداي جاساۋدىڭ ماڭىزدىلىعىن اتاپ ءوتتى.
«نارحوز» ۋنيۆەرسيتەتىنىڭ پرەزيدەنتى قانات قوجاحمەت جاتاقحانا ءبىلىم بەرۋ گرانتى بويىنشا دا، كوممەرسيالىق نەگىزدە دە وقيتىن ستۋدەنتتەرگە ارنالعانىن اتاپ ءوتتى. سونىمەن قاتار، ەرەكشە قاجەتتىلىكتەرى بار ستۋدەنتتەرگە ارنالعان ارنايى بولمەلەر قاراستىرىلعان.
جوباعا سايكەس، 424 ورىندىق زاماناۋي جاتاقحانادا ستۋدەنتتەرگە جايلى ينكليۋزيۆتى بولمەلەر، اسحانا، مەديسينالىق ورتالىق، ينتەرنەتكە قول جەتىمدى كوۆوركينگ-ايماق، وقۋعا جانە دەمالۋعا ارنالعان قوعامدىق كەڭىستىكتەر بولادى.
اۋماقتى اباتتاندىرۋ جانە كوگالداندىرۋ اياسىندا 100-دەن استام بۇتالار مەن اعاشتار وتىرعىزىلادى، لاندشافتتىق كوگالداندىرۋ، workout-ايماقتار جانە سيرەك وسىمدىكتەرى بار پايدالانىلاتىن شاتىر دا قاراستىرىلعان.
ايتا كەتەرلىگى، الماتىدا 35 جوعارى وقۋ ورنىندا 199 مىڭنان استام ستۋدەنت وقيدى، ونىڭ 124 مىڭى (62،2%) قالادان تىس جەرلەردە تۇراتىندار. مەگاپوليستە 109 جاتاقحانا جۇمىس ىستەيدى، وندا 36،2 مىڭ ستۋدەنت تۇرادى.
جاتاقحانالار سالۋ بويىنشا جۇمىستى ۇيلەستىرۋ ءۇشىن 2023 جىلدىڭ ناۋرىز ايىندا الماتى قالاسىنىڭ اكىمدىگى عىلىم جانە جوعارى ءبىلىم مينيسترلىگىمەن بىرلەسىپ جوبالاۋ ءوفيسىن ىسكە قوستى. جوبالىق ءوفيستىڭ نەگىزگى مىندەتى الماتى قالاسىنىڭ اۋماعىندا جاتاقحانالار سالۋ جانە ستۋدەنتتەردى تۇرعىن ۇيمەن قامتاماسىز ەتۋ جونىندەگى مەملەكەتتىك باعدارلامانى ىسكە اسىرۋ ءۇشىن قولايلى جاعدايلار جاساۋ، اتاپ ايتقاندا، قالا اكىمدىگى مەن قارجى ورتالىعى تاراپىنان تۇرعىن ءۇي قۇرىلىسىنا مۇددەلى جوعارى وقۋ ورىندارى مەن الەۋەتتى ينۆەستورلارعا شۇعىل زاڭگەرلىك، كونسۋلتاسيالىق جانە ساراپتامالىق كومەك كورسەتۋ بولىپ تابىلادى. ىسكە قوسىلعان ساتتەن باستاپ جوبالىق وفيسكە 120 الەۋەتتى ينۆەستور جۇگىندى، بۇل قولداۋ تەتىگىنىڭ تارتىمدىلىعىن كورسەتەدى.
ماسەلەن، 2023 جىلى جاتاقحانالار سالۋ جوسپارى ەكى ەسەگە جۋىق ورىندالدى-3 969 توسەك-ورىنعا ارنالعان 14 نىسان پايدالانۋعا بەرىلدى، جوسپارلى كورسەتكىشى 2 مىڭ توسەك-ورىن. جاتاقحانا تاپشىلىعى 32،7 مىڭنان 28،7 مىڭ توسەك-ورىنعا دەيىن قىسقاردى.
2024 جىلعا جوسپارلى كورسەتكىش-4 مىڭ توسەك-ورىن، الايدا 6 690 توسەك-ورىنعا 15 نىساندى ەنگىزۋ جوسپارلانۋدا، ونىڭ ىشىندە 1 165 توسەك-ورىنعا 5 نىسان وقۋ جىلىنىڭ باسىندا پايدالانۋعا بەرىلەدى.
الماتىنىڭ 2025 جىلعا دەيىنگى دامۋ باعدارلاماسى اياسىندا قالا اكىمدىگىنىڭ جوبالىق ءوفيسىنىڭ قولداۋىمەن 12 مىڭ توسەك-ورىنعا، ال 2030 جىلعا قاراي تاعى 20 مىڭ توسەك - ورىنعا جاتاقحانالاردى ىسكە قوسۋ جوسپارلانۋدا. وسىلايشا، الماتىداعى جاتاقحانالاردىڭ تاپشىلىعىنا بايلانىستى ماسەلە تولىعىمەن شەشىلەتىن بولادى.