الماتىداعى «ءبىلىم-يننوۆاسيا» قىزدار ليسەيىنە ءشامشا بەركىمبايەۆانىڭ ەسىمى بەرىلدى

بيىل – اياۋلى ۇستاز ءتىرى بولعاندا 80 جاسقا تولار ەدى

الماتىداعى ءبىلىم-يننوۆاسيا قىزدار ليسەيىنە ۇلاعاتتى ۇستاز ءشامشا بەركىمبايەۆانىڭ ەسىمى بەرىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

ول – ءبىراز جىل پارلامەنت سەناتىنىڭ دەپۋتاتى بولدى. ءبىلىم جانە عىلىم ءمينيسترى قىزمەتىن اتقارىپ، ەلىمىزدىڭ وقۋ سالاسىندا اۋقىمدى رەفورمالاردى جۇزەگە اسىرۋ ءۇشىن سۇبەلى ۇلەس قوسقان. بيىل – اياۋلى ۇستاز ءتىرى بولعاندا 80 جاسقا تولار ەدى.

«وتاندىق ءبىلىم بەرۋ جۇيەسىن دامىتۋ ماقساتىندا حالىقارالىق تاجىربيەنى قولدانۋ ارقىلى ەلىمىزدە 92-93 جىلدارى قازاق-تۇرىك ليسەيلەرى اشىلعان بولاتىن. سول ليسەيلەردىڭ ءبىرى – الماتىداعى قىزدارعا ارنالعان ءبىلىم-يننوۆاسيا ليسەيى»، – دەدى «ءبىلىم-يننوۆاسيا» قوعامدىق قورىنىڭ پرەزيدەنتى دارحان ەرماحان ۇلى.

سالتاناتتى جيىندا مۇعالىمدەرگە ارنالعان «قادام» دەپ اتالاتىن كىتاپتىڭ تۇساۋى كەسىلدى. وقۋ-ادىستەمەلىك قۇرال «ءبىلىم-يننوۆاسيا» قوعامدىق قورىنىڭ ۇيىتقى بولۋىمەن جارىق كورگەن. تۋىندى وقۋشىلاردىڭ ءبىلىم ساپاسىن ارتتىرۋ ءۇشىن باعىتتالعان.

«ليسەيگە ءشامشا اپايدىڭ اتى بەرىلگەنىنە قۋانىشتىمىن. بۇل ءبىزدىڭ مەكتەبىمىزدىڭ تاريحىنىداعى وتە ۇلكەن، ماڭىزدى شارا. ءبىزدىڭ وسى مەكتەپتە وقىپ جاتقان قىزدارىمىز دا ءشامشا اپايىمىز سەكىلدى ۇلكەن قايراتكەر بولادى دەگەن سەنىمدەمىز»، – دەدى ش. بەركىمبايەۆا اتىنداعى ءبىلىم-يننوۆاسيا قىزدار ليسەيىنىڭ وقۋشىسى اجارلى باقتىباي.