بيىل قازاق راديوسىنا - 100 جىل!
الماتىداعى اۆتوبۋس ايالدامالارىنىڭ بىرىنە «قازاق راديوسىنىڭ» اتى بەرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاق» جانە «شالقار» راديولارىنىڭ الماتى ستۋدياسىنىڭ جەتەكشىسى باقىت جاعىپار ۇلىنىڭ ايتۋىنشا، اۆتوبۋس ايالداماسى قازاق تەليەۆيزياسىنىڭ قارا شاڭىراعى ورنالاسقان جەلتوقسان كوشەسى، 175 ءۇيدىڭ ىرگەسىندە.
«اتالعان كوشەمەن جۇرەتىن اۆتوبۋستاردا جاڭا ايالدامانىڭ اتى ەكى تىلدە اتالا باستادى. سونىمەن قاتار، ايالداماعا قازاق راديوسىنىڭ قوندىرعىسى ورناتىلدى. ياعني، بۇگىننەن باستاپ راديودان تارايتىن جاڭالىقتار مەن حابارلاردى جولاۋشىلار تىڭداي الادى. قازاق راديوسى سويلەپ تۇرادى»،- دەيدى باقىت جاعىپار ۇلى.
سونىمەن قاتار، ول قازاق راديوسىنىڭ 100 جىلدىعىنا وراي مەموريالدى تاقتا ورناتىلعانىن اتاپ ءوتتى.
«الماتى قالالىق مادەنيەت باسقارماسىنىڭ قولداۋىمەن قازاق راديوسىنىڭ عيماراتىنا، قارا شاڭىراققا راديو ءۇيى دەگەن مەموريالدىق تاقتا ورناتىلدى»،-دەيدى ول.
سونداي-اق ق ر ۇلتتىق كىتاپحاناسىندا «الماتىدان سويلەپ تۇرمىز...» اتتى راديونىڭ عاسىرلىق تاريحىنان سىر شەرتەتىن كونە قۇجاتتار مەن سۋرەتتەر كورمەسى ءوتتى. ايتا كەتەيىك، بيىل قازاق راديوسىنا 100 جىل، «شالقار» راديوسىنا 55 جىل تولىپ وتىر.
مەملەكەت باسشىسى قاسىم-جومارت توقايەۆ «1 قازان - راديو قىزمەتكەرلەرى كۇنى» دەپ جاريالاۋدى ۇسىنعان بولاتىن. پرەزيدەنت ۇسىنىسى قولداۋ تاۋىپ، 13 تامىزدا ق ر ۇكىمەتىنىڭ قاۋلىسى شىقتى. ەستەرىڭىزگە سالا كەتەيىك، قازاقستاندا راديوحابار تاراتۋ تاريحى 1921 جىلدىڭ قازان ايىندا باستالدى.