قالادا جىلدىڭ ۇزدىك ۇستازى انىقتالدى
رەسپۋبليكالىق «قازاقستان ءمۇعالىمى-2021» ۇلتتىق سىيلىعى وسىمەن ءۇشىنشى رەت وتكىزىلىپ وتىر. بايقاۋدىڭ ماراپاتتاۋ ءراسىمى سالتاناتتى تۇردە اتالىپ ءوتتى. جەڭىمپاز فينالدىق كەزەڭگە وتكەن ون لاۋرەاتتىڭ ىشىنەن انىقتالدى. جىلدىڭ ۇزدىك ۇستازى 4 ملن تەڭگە قارجىلاي جۇلدەگە يە بولدى. ەندى ول «الەم ءمۇعالىمى» بايقاۋىنا قاتىسادى، دەپ حابارلايدى Almaty-akshamy.kz.
Almaty.tv سايتىنىڭ مالىمەتتەرىنە سايكەس،«قازاقستان ءمۇعالىمى-2021» ۇلتتىق سىيلىعىنا 300-دەن استام ۇمىتكەردەن ءوتىنىم كەلىپ تۇسكەن. ولاردىڭ اراسىنان وزىق شىققان 10 پەداگوگ فينالدىق كەزەڭگە ءوتتى. ۇزدىك ۇستازدى انىقتاۋداعى نەگىزى تالاپ – ءمۇعالىمنىڭ الەۋمەتتىك ىستەرگە قاتىسۋى نازارعا الىنادى. حالىقارالىق بايقاۋ ەلىمىزدە قوعامدىق ماڭىزى بار باستامالاردى دامىتۋ قورىنىڭ ۇيىمداستىرۋىمەن ءوتتى.
«قۇرمەتتى دوستار، بۇگىنگى بايقاۋدىڭ فيناليستەرى، مەن سىزدەرمەن ماقتانامىن. بۇگىنگى جەڭىسپەن شىن جۇرەكتەن قۇتتىقتايمىن. بارلىق مۇعالىمگە زور دەنساۋلىق جانە شىعارماشىلىق تابىس تىلەيمىن»، – دەدى قوعامدىق ماڭىزى بار باستامالاردى دامىتۋ قورىنىڭ قۇرىلتايشىسى ءاليا نازاربايەۆا.
ەلىمىزدىڭ تۇكپىر-تۇكپىرىنەن جيىلعان ۇزدىك وندىقتىڭ اراسىنان الماتىلىق اللا بۋرەنكوۆا ۇزدىك شىقتى. ول قالالىق №42 مەكتەپتە مۋزىكا پانىنەن ءدارىس بەرەدى. بۇگىنگە دەيىن ساباق وتكىزۋ بارىسىنداعى ەرەكشە ادىستەمەلەرى حالىقارالىق باسىلىمداردا جاريالانىپ ءجۇر. شاكىرتتەرى عىلىمي سايىستاردىڭ جانە حالىقارالىق وليمپيادالاردىڭ جەڭىمپازدارى اتانىپ ۇلگەرگەن. ەندى ول الداعى جىلى وتەتىن «الەم ءمۇعالىمى» بايقاۋىنا جولداما الدى. حالىقارالىق كونكۋرستىڭ جۇلدە قورى 1 ملن اقش دوللارىن قۇرايدى.
«شىنىمدى ايتسام، مەن بۇل جۇلدەنى جەڭىپ الامىن دەپ ويلاماپ ەدىم، ءالى دە سەنە الماي تۇرمىن. بۇل كونكۋرس شىنىمەن دە، مۇعالىمدەردىڭ تاجىربيەسىمەن جانە قۇندىلىقتارىمەن تانىسۋعا مۇمكىندىك بەرەدى»، – دەيدى «قازاقستان ءمۇعالىمى-2021» ۇلتتىق سىيلىعىنىڭ يەگەرى اللا بۋرەنكوۆا.
اسحات جۇمابەكوۆ – سەمەيدەگى نازاربايەۆ زياتكەرلىك مەكتەبەنىڭ ءمۇعالىمى. وتكەن جىلى جاھاندىق سىيلىقتىڭ ءفيناليسى اتانىپ، الەمنىڭ ۇزدىك 50 ءمۇعالىمىنىڭ قاتارىنا قوسىلعان. بۇل – تاريحي وقيعا، ويتكەنى بۇرىن-سوڭدى ەلىمىزدەن بىردە-بىر پەداگوگ اتالعان سىيلىققا ۇمىتكەر بولماعان.
«زاماناۋي ءمۇعالىم ءارقاشان ىزدەنىس ۇستىندە ءجۇرىپ، ءوزىن جەتىلدىرىپ وتىرۋى كەرەك. وقۋشىلاردىڭ عىلىمي جۇمىستارىمەن اينالىسۋىنا جاعداي جاساۋى قاجەت. جەكە ۇستانىمىم دا وسى. ساباقتارىمدى تاجىريبە نەگىزىندە وتكىزۋگە تىرىسامىن»، – دەدى Global Teacher Prize حالىقارالىق سىيلىعىنىڭ نومينانتى اسحات جۇمابەكوۆ.
اتاپ وتكەن ءجون، Global Teacher Prize – نوبەل سىيلىعىنىڭ بالاماسى. تەك ۇستازدارعا بەرىلەدى. ۇمىتكەرلەردىڭ ەڭبەگىن تاۋەلسىز ساراپشىلاردان قۇرالعان پەداگوگيكانىڭ جەتەكشى ماماندارى، قوعام قايراتكەرلەرى جانە اتا-انالار قاۋىمداستىعىنىڭ وكىلدەرى باعالادى. ەلىمىزدە مۇنداي ۇلتتىق سىيلىقتى وتكىزۋ داستۇرگە اينالماق.