الماتى قالاسىنداعى اۋدانداردىڭ بىرىندە “ۋچاسكە” جەدەل-پروفيلاكتيكالىق ءىس-شاراسى اياسىندا جەرگىلىكتى ءىس-شارا وتكىزىلدى.
ونىڭ ماقساتى – ءتيىستى قۇقىقتىق ءتارتىپتى قامتاماسىز ەتۋ، كوشەلەر مەن قوعامدىق ورىنداردا قىلمىستىڭ الدىن الۋ جانە جولىن كەسۋ. جەرگىلىكتى ءىس-شارا قالانىڭ الاتاۋ اۋدانىندا دا جۇرگىزىلدى. وعان 100-دەن استام كريمينالدىق جانە يۋۆەنالدىق پوليسيا قىزمەتكەرى، ۋچاسكەلىك پوليسيا ينسپەكتورى، جقاج جانە پاترۋلدىك پوليسيا قىزمەتكەرى قاتىستى، دەپ حابارلايدى aqshamnews.kz Polisia.kz-كە سىلتەمە جاساپ.
– سونىمەن قاتار اۋدانداعى قىلمىستىق احۋالدى ەسكەرە وتىرىپ، 20 جاياۋ جاساقتىڭ باعىتى ازىرلەندى. جۇرگىزىلگەن رەيدتىك ءىس-شارالاردىڭ ەكى كۇنىنىڭ ىشىندە 184 قۇقىق بۇزۋشىلىق انىقتالدى، ونىڭ ىشىندە 28 ۇساق بۇزاقىلىق، 18 تەمەكى شەگۋگە تىيىم سالۋ، 5 الكوگولدىك ونىمدەردى ساتۋ، ءۇي جانۋارلارىن سەرۋەندەتۋ ەرەجەسىن بۇزۋعا قاتىستى 19 دەرەك انىقتالدى. سونداي-اق كامەلەتكە تولماعانداردىڭ تۇنگى ۋاقىتتا ەرەسەكتەردىڭ قاراۋىنسىز جۇرۋىنە قاتىستى 27 دەرەك بەلگىلى بولدى، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
تاجىريبە بويىنشا جاسالعان قىلمىستىڭ جارتىسىنان كوبى زاڭسىز جۇرگەن شەتەلدىكتەر تاراپىنان جاسالادى. وسىعان بايلانىستى ءىس-شارا كۇندەرىندە پوليسەيلەر الماتى قالاسىنا كورشىلەس مەملەكەتتەردەن جانە رەسپۋبليكانىڭ باسقا وڭىرلەرىنەن كەلەتىن ادامدارعا باقىلاۋدى كۇشەيتتى. سونىمەن قاتار كوشى-قون پوليسياسىنىڭ قىزمەتكەرلەرى قالادا زاڭسىز تۇرىپ جاتقان شەتەل ازاماتتارىنىڭ شوعىرلانۋ ورىندارىن، اتاپ ايتقاندا، قوناق ۇيلەردى، جالدامالى پاتەرلەردى، وقۋ ورىندارى مەن كاسىپورىنداردىڭ جاتاقحانالارىن، قۇرىلىس نىساندارىن تەكسەردى.