— «الماتى تۇلعالارى» جوباسىنىڭ باستى ماقساتى — ماقساتى ايقىن ازاماتتاردى انىقتاۋ جانە قولداۋ. ءبىز وسىنداي تالانتتى ءارى ۇلگىلى ادامدارىمىز بار ەكەنىنە ماقتانامىز. ولاردىڭ قالا دامۋىنا قوسقان ۇلەسىن ىنتالاندىرۋ وتە ماڭىزدى دەپ سانايمىن. ءارقايسىمىز الماتىنى جاقسارتا الاتىنىمىزدى ءتۇسىنۋىمىز كەرەك. بۇل بايقاۋ — تۇرعىندارعا ءوز جەتىستىكتەرى مەن باستامالارىن ۇلگى رەتىندە كورسەتۋگە تاماشا مۇمكىندىك. بايقاۋ العاش رەت 2022 جىلى وتكىزىلدى جانە قالا تۇرعىندارىنىڭ ۇلكەن قىزىعۋشىلىعىن تۋدىردى. بىزگە كوپتەگەن وتىنىشتەر كەلىپ ءتۇستى، بۇل باستامانىڭ سۇرانىسقا يە ەكەنىنىڭ كورىنىسى. بيىل جوبانى قايتا وتكىزۋگە شەشىم قابىلدادىق، ويتكەنى ءبىز تابىسقا جەتۋگە ۇمتىلاتىن جانە ءوز تاجىريبەسىمەن بولىسكىسى كەلەتىن ادامداردى قولداۋدى جالعاستىرامىز، — دەدى الماتى قالاسى قوعامدىق دامۋ باسقارماسىنىڭ قوعامدىق دامۋ ورتالىعىنىڭ ارنايى جوبالاردى ىسكە اسىرۋ ءبولىمىنىڭ جەتەكشىسى اسەل ەربولاتوۆا.
«الماتى تۇلعالارى» جوباسى اياسىندا جەتىستىك پەن تابىس يدەيالارىن ناسيحاتتاپ، سۇيىكتى قالامىزدىڭ دامۋى مەن گۇلدەنۋىنە ۇلەس قوسقان قالا تۇرعىندارىنان 100-دەن استام ءوتىنىم ءتۇستى. مۇقتاج جاندارعا قول ۇشىن سوزىپ، تۋعان قالاسىنىڭ يگىلىگى ءۇشىن ەڭبەك ەتىپ جۇرگەن، ورتاق ادامگەرشىلىك قۇندىلىقتاردى ناسيحاتتاعان جوباعا كونكۋرستىق كوميسسيا ارقىلى ىرىكتەلىپ، ۇزدىك دەپ تانىلعان 5 تۇلعا «ۇرپاق تالىمگەرى»، «ۇلاعاتتى ۇستاز – ۇزدىك شاكىرت»، «قايىرىمدى كاسىپكەر»، «ۇزدىك باعبان – ۇلگىلى ازامات»، «ۇزدىك ۆولونتەر – مەيىرىمدى جان» نوميناسيالارى بويىنشا ماراپاتتالدى. سونىمەن قاتار، بايقاۋ جەڭىمپازدارىنا ديپلومدار مەن سىيلىقتار تابىستالدى.
جەڭىمپازدار قاتارىندا ق ر مادەنيەت قايراتكەرى گۇلشارا ەسەت قىزى جوبانىڭ ماڭىزدىلىعىن اتاپ ءوتتى:
— قوعامدىق دامۋ باسقارماسىنىڭ قوعامدىق دامۋ ورتالىعى ەرەكشە جوبالار جاساپ جاتىر. بۇل دامۋشى قوعام ءۇشىن وتە ماڭىزدى. جوبا — ەڭبەگى ەلەنبەي جۇرگەن، قالامىزدىڭ ءارتۇرلى سالا قىزمەتكەرلەرىنە نازار اۋداراتىن باستاما. الداعى ۋاقىتتا دا كوپتەگەن جوبالار بولادى دەپ ۇمىتتەنەمىن، — دەدى ول.