الماتىدا ءبىر كۇندە 200-دەن استام ەسىرتكى جارناماسى ءوشىرىلدى، دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
الماتى قالاسىندا پوليسيا، اۋەزوۆ اۋدانىنىڭ كوميۋنيتي ورتالىعى جانە Jas Volunteers ەرىكتىلەرى بىرلەسىپ، ەسىرتكى ساۋداسىن ناسيحاتتايتىن ينتەرنەت-رەسۋرستارعا اپاراتىن تىيىم سالىنعان جازبالاردى جويۋعا باعىتتالعان ارنايى اكسيا وتكىزدى.
شارا بارىسىندا ءبىر تاۋلىكتىڭ ىشىندە 200-دەن استام جارناما وشىرىلگەن. اكسيا پروفيلاكتيكا جىلى اياسىندا ۇيىمداستىرىلدى.
الماتى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇمابايەۆ جاستارعا باعىتتالعان مۇنداي قاۋىپكە جول بەرمەۋ ماڭىزدى ەكەنىن اتاپ ءوتتى.
«قالانى ەسىرتكى جارناماسىنان جۇيەلى تۇردە تازارتىپ كەلەمىز. ءار جازبا – جاستاردى قىلمىستىق سحەماعا تارتىپ اكەتۋى مۇمكىن. ەرىكتىلەرگە ۇلكەن العىس ايتامىز. كۇشىمىز – بىرلىكتە»، – دەدى ول.
پوليسيا قالا تۇرعىندارىن كوشەدە، عيمارات قابىرعالارىندا نەمەسە اۋلالاردا ەسىرتكىنى ناسيحاتتايتىن بەلگىلەر مەن سىلتەمەلەردى بايقاسا، دەرەۋ قۇقىق قورعاۋ ورگاندارىنا حابارلاۋعا شاقىرادى. بۇل تىيىم سالىنعان كونتەنتتى جەدەل جويۋعا جانە ونىڭ تارالۋىنىڭ الدىن الۋعا مۇمكىندىك بەرەدى.