الماتىداعى ايالدامالار كەلەر جىلدان باستاپ ستاندارتقا ساي بولادى

كەلەسى جىلدان باستاپ بۇل ماسەلە رەتكە كەلتىرىلەدى. 

الماتىدا ايالداما كەشەندەرى ستاندارتتالادى. بۇل تۋرالى قالا اكىمى ەربولات دوسايەۆ اۋەزوۆ اۋدانى تۇرعىندارىمەن كەزدەسۋى بارىسىندا ايتتى، دەپ حابارلايدى Almaty-akshamy.kz.

قالا باسشىسىمەن كەزدەسۋگە كەلگەن اۋەزوۆ اۋدانىنىڭ تۇرعىنى قالاداعى ايالدامالار ماسەلەسىن كوتەردى.

«ءال-فارابي داڭعىلىندا ايالدامالاردىڭ اتاۋى جازىلىپ تۇرادى. بۇل جولاۋشىلار ءۇشىن وتە ىڭعايلى. ال باسقا كوشەلەردە ولاي ەمەس. بارلىق ايالدامالاردا دا جازىلىپ تۇرسا دەگەن ءوتىنىش بار. ادام سوعان قاراپ، قاي جەرگە جەتكەنىن تۇسىنەدى»، - دەدى الماتى تۇرعىنى.

ەربولات دوسايەۆ ءال-فارابي داڭعىلىنداعى ايالداما كەشەندەرى جەكە ينۆەستورلاردىڭ ەسەبىنەن جاسالعانىن ايتتى.

«دۇرىس ايتاسىز. ءبىزدىڭ قالادا، وكىنىشكە وراي، ايالدامالار ستاندارتتالماعان. ءبىز قالانىڭ ديزاين-كود جوباسىن دامىتىپ جاتىرمىز، سونىڭ ىشىندە ايالدامالار دا بار. بەنچمارك الامىز. كەلەسى جىلدان باستاپ بۇل ماسەلەنى رەتكە كەلتىرەمىز. ايالدامالاردا ستاندارتتالعان زاتتار بولادى: اتاۋى، باعىتى جانە تاعى باسقاسى 2023 جىلدىڭ 1 قاڭتارىنان باستاپ، ءبىز بۇل جاعدايدى وزگەرتە باستايمىز دەپ ۇمىتتەنەمىز»، - دەدى ەربولات دوسايەۆ.