الماتىدا تاعى ءبىر زاڭسىز ساۋدا نىسانى ءسۇرىلدى: قونايەۆ جانە ياسساۋي كوشەلەرىنىڭ قيىلىسىنداعى بۋرگەر ساتاتىن دۇڭگىرشەك بۇزىلدى، دەپ حابارلايدى aqshamnews.kz
الماتىدا زاڭسىز ستاسيونارلىق ەمەس ساۋدا نىساندارىن (سەسن) جاپپاي ءسۇرۋ جۇمىستارى جالعاسىپ وتىر. كەزەكتى بۇزىلعان نىسان – ناۋرىزباي اۋدانىنداعى قونايەۆ جانە ياسساۋي كوشەلەرىنىڭ قيىلىسىندا ورنالاسقان بۋرگەر دايىندايتىن دۇڭگىرشەك.
بۇل ءسۇرۋ جۇمىستارى الماتى قالاسى اكىمى ەربولات دوسايەۆتىڭ تاپسىرماسىمەن قالا اكىمدىگى باستاعان زاڭسىز ورناتىلعان سەسن-داردى جويۋ ناۋقانى اياسىندا جۇرگىزىلىپ جاتىر.
2025 جىلدىڭ 4 اقپانىنان باستاپ كاسىپكەرلىك جانە ينۆەستيسيالار باسقارماسى جۇمىس توبىمەن بىرلەسىپ كوشە ساۋداسى نىساندارىن جويۋعا كىرىستى. بۇگىنگى تاڭدا مەملەكەتتىك قور جەرىندە ورنالاسقان 300-دەن استام سەسن بۇزىلدى.
بۇل جۇمىس اياسىندا 222 ويىن اۆتوماتى (سيلومەر) الىنىپ تاستالدى. سونداي-اق، قالادا جەر تەلىمدەرىنە ورنالاسقان 32 كۇردەلى قۇرىلىس نىسانى انىقتالدى. جۇمىس توبى ولاردى ءماجبۇرلى تۇردە ءسۇرۋ ءۇشىن سوتقا تالاپ-ارىز جولدادى.
الماتىنىڭ مەدەۋ اۋدانىنىڭ تۇرعىنى تاتيانا كاساتكينا دۇڭگىرشەكتەر بۇزىلعاسىن قالا كەڭەيىپ، تازارىپ، جاياۋ جۇرگىنشىلەرگە ارنالعان ورىن كوبەيگەنىن ايتادى.
«دوستىق داڭعىلى بويىنداعى، سونىڭ ىشىندە «دوستىق پلازا» ساۋدا ورتالىعى مەن «وربيتاداعى» دۇڭگىرشەكتەردى الىپ تاستاعانىنا وتە قۋانىشتىمىز. بۇرىن فاستفۋد تۇتىنۋشىلارىنان قالعان قوقىس ۇيىندىلەرى، ارىقتاعى ەگەۋقۇيرىقتار ءجيى بايقالاتىن. ءبىزدىڭ حالىققا تاماقتانۋ مادەنيەتى مەن تازالىقتى ساقتاۋدى ۇيرەنۋ كەرەك، سەبەبى تاماقتانىپ بولعان سوڭ قالدىقتارىن جەرگە، اسفالتقا تاستاي سالادى. دۇڭگىرشەكتەردىڭ ماڭىنداعى قوقىس جاشىكتەرى ءجيى تولىپ تۇراتىن. ونىڭ ۇستىنە، فاستفۋد دەنساۋلىققا زيان عوي. وسىنداي ورىندارداعى قىزمەتكەرلەردىڭ تازالىعى مەن تاماق دايىنداۋ سانيتارلىق نورمالارى دا كۇمان تۋدىرادى. مەدەۋ اۋدانى تۋريستەر ءجيى كەلەتىن ورىن بولعاندىقتان، قالانىڭ جالپى كەلبەتى ماڭىزدى. كوكتەمگە دەيىن قالامىز تازارىپ، ادەمى جانە جايلى بولسا ەكەن»، – دەدى ت.كاساتكينا.
قالعان 210 سەسن-دى بۇزۋ جۇمىستارى 15 ناۋرىزعا دەيىن اياقتالادى. كوممۋنالدىق قىزمەت بۇل نىساندارعا زاڭسىز قوسىلعان ينجەنەرلىك جەلىلەردى اجىراتىپ جاتىر.