بۇدان بۇرىن الماتىدا زاڭسىز جۇمىس ىستەپ جۇرگەن وزبەكستاندىق جۇمىسشىلاردىڭ ۇستالعانىن حابارلاعانبىز.
الماتىدا زاڭسىز جۇمىس كۇشىنىڭ تاعى ءبىر پارتياسى انىقتالدى، – دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
بۇل جولى الماتىنىڭ بوستاندىق اۋدانىنداعى ءۇش قاباتتى تۇرعىن ءۇي كەشەنىنىڭ قۇرىلىسىندا ەلگە زاڭسىز كەلگەندەر جۇمىس ىستەگەن.
«ءبىزدىڭ بولىمشەنىڭ قىزمەتكەرلەرى بوستاندىق اۋداندىق پب-داعى ارىپتەستەرىنىڭ كومەگىمەن جۇمىسقا رۇقساتتارى بولماسا دا، ەڭبەك ەتىپ جۇرگەن 16 شەتەل ازاماتىن انىقتادى. ولاردى قارا جۇمىسشى رەتىندە جۇمىسقا العان. تەكسەرۋ بارىسىندا جوعارىدا اتالعان ازاماتتاردىڭ جەكە باسىن كۋالاندىراتىن قۇجاتتارى جوق ەكەندىگى انىقتالدى. قازاقستان رەسپۋبليكاسىنىڭ «قۇقىق بۇزۋشىلىق پروفيلاكتيكاسى تۋرالى» زاڭىنىڭ 29-بابىنا سايكەس، ماتەريال جيناقتالىپ، ودان ءارى پوليسيا دەپارتامەنتىنىڭ قابىلداپ-تاراتۋىنا ورنالاستىرۋ ءۇشىن الماتى قالاسىنىڭ مامانداندىرىلعان اۋدانارالىق اكىمشىلىك سوتىنا جىبەرىلدى»، – دەدى الماتى قالالىق پد كوشى-قون باسقارماسى قىزمەتىنىڭ باسشىسى اسحات بۋتۋنچينوۆ.
پوليسيا 6 جەلتوقساننان باستاپ شاھار اۋماعىندا زاڭسىز كوشى-قون ارنالارىن، قازاقستان رەسپۋبليكاسىنىڭ كوشى-قون زاڭناماسىن بۇزعان ادامداردى انىقتاۋعا جانە جولىن كەسۋگە، سونداي-اق، قالاداعى قىلمىستىق جاعدايدى جاقسارتۋعا باعىتتالعان «كەلىمسەك» رەسپۋبليكالىق جەدەل الدىن الۋ ءىس-شاراسى وتكىزىلىپ جاتقانىن ەسكە سالدى.