بۇگىن 1991 جىلى 10 جەلتوقساندا نازاربايەۆ ق ر پرەزيدەنتى رەتىندە انت بەرگەن كۇن
Nur Otan پارتياسىنىڭ باسپا ءسوز قىزمەتى «تاريحتا وسى كۇنى» ايدارىمەن الەۋمەتتىك جەلىلەردە حالىق سايلاعان ەلدىڭ تۇڭعىش پرەزيدەنتى نۇرسۇلتان نازاربايەۆ انت بەرگەن تاريحي داتا – 1991 جىلعى 10 جەلتوقسان كۇنىنە ارنالعان بەينەروليك جاريالادى، دەپ حابارلايدى Almaty-akshamy.kz
وسىدان تۋرا 30 جىل بۇرىن ءدال وسى كۇنى قازاق كسر-نىڭ اتاۋىن قازاقستان رەسپۋبليكاسى دەپ وزگەرتۋ تۋرالى شەشىم قابىلداندى.
«تاۋەلسىزدىك العاننان كەيىن ەلىمىزدىڭ مەملەكەتتىك شەكارالارى ناقتى بەلگىلەندى. قوعامدا بەيبىتشىلىك پەن كەلىسىمنىڭ بىرەگەي ۇلگىسى – قازاقستان حالقى اسسامبلەياسى قۇرىلدى. قازاقستان قۋاتى جاعىنان الەمدەگى ءتورتىنشى يادرولىق ارسەنالدان باس تارتتى»، - دەلىنگەن بەينەروليكتە. كەدەيلىك دەڭگەيى 10 ەسە، ياعني 46،7-دەن 4،6%-كە دەيىن قىسقاردى. $400 ميلليارد تىكەلەي ينۆەستيسيا تارتىلدى.
بۇل – ورتالىق ازيا ەلدەرىنە كەلەتىن بارلىق ينۆەستيسيا اعىمىنىڭ 75%-تەن استامى. «170 ميلليون شارشى مەتر تۇرعىن ءۇي پايدالانۋعا بەرىلدى. 30 مىڭ شاقىرىم جول سالىنىپ، قايتا جاڭارتىلدى. 1400 جاڭا دەنساۋلىق ساقتاۋ نىسانى، 1800-دەن استام جاڭا مەكتەپ پەن 900 بالاباقشا اشىلدى»، - دەپ اتاپ ءوتتى پارتيانىڭ باسپا ءسوز قىزمەتى قازاقستان حالقىن كەلە جاتقان تاۋەلسىزدىك كۇنىمەن قۇتتىقتاي وتىرىپ.
ەسكە سالا كەتەيىك، Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ قازاقستاندىق جاستارعا نەگىزگى باعدار بولاتىن «ەلدىكتىڭ 7 تۇعىرى» قاعيداتتارىنىڭ جيىنتىعىن ۇسىنعان بولاتىن. ولار - «تاۋەلسىزدىك – كەز كەلگەن ازامات ءۇشىن ەڭ قاستەرلى قۇندىلىق»، «بىرلىك پەن كەلىسىم – ەلدىگىمىزدىڭ مىزعىماس تۇعىرى»، «جەر – اتا-بابا مۇراسى، حالىق قازىناسى»، «وتباسى مەن ءسالت-داستۇر – قوعامنىڭ التىن دىڭگەگى»، «ۇلتتىق مادەنيەت – حالىقتىڭ رۋحاني تىرەگى»، «ءبىلىم مەن ەڭبەك – باقۋاتتى ءومىردىڭ كىلتى» جانە «پراگماتيزم – باسەكەگە قابىلەتتى بولۋدىڭ كەپىلى» قاعيداتتارى.