كرەاتيۆتى يندۋستريانىڭ جارقىن ۇلگىسى بولماق.
سوڭعى ۇلگى مەن ەرەكشە ديزاينعا ساي جاساقتالاتىن ونەر مۇراجايىنىڭ قۇرىلىسى قاراشا ايىندا باستالادى. قالا كۇنى قارساڭىندا الماتى اكىمى باقىتجان ساعىنتايەۆ اتالعان نىساننىڭ جوباسىمەن تانىسىپ قايتتى، دەپ حابارلايدى اlmaty-akshamy.kz Almaty.tv-گە سىلتەمە جاساپ.
الماتى ونەر مۇراجايى. بۇل تەك كوركەمونەر تۋىندىلارىنىڭ باسىن قوسقان ورىن ەمەس، جالپى كرەاتيۆتى يندۋستريانىڭ جارقىن ۇلگىسى بولماق. سەبەبى مۇندا وتاندىق ءھام جاھاندىق ونەر يەلەرىنىڭ تۋىندىلارىمەن قاتار، الەمدىك دەڭگەيدەگى كىتاپتار دا ۇسىنىلادى. جالپى اۋدانى 10 مىڭ 400 شارشى مەتر بولاتىن عيمارات وسىلايشا جاھاندىق دەڭگەيدەگى كورمەلەردى الماتىدا-اق وتكىزۋگە مۇمكىندىك بەرمەك. ايتا كەتۋ كەرەك، مونۋمەنتالدى ەكسپوناتتاردى ورناتاتىن ۋاقىتشا كورمەلەر زالىنىڭ اۋدانى 1000 شارشى مەتر، ال بيىكتىگى 12 مەتردى قۇرايدى.
نىساننىڭ اۋماعىن الماتى ونەر مۇراجايىنا قالالىق اكىمدىك ارنايى ۇسىنعان. جوبانىڭ يدەياسىنا ساي، مۇندا «جاسىل الماتى» اكسياسىنىڭ نەگىزىندە كوشەتتەر وتىرعىزىلىپ، ەرەكشە ۇلگىدەگى ساياباق جاسالادى. 1،5 كيلومەترلىك راديۋستا كوگالداندىرىلعان اۋماقتىڭ جوق ەكەنىن ەسكەرسەك، بۇل ورىن وسى شاعىناۋدانداعى تۇرعىندار ءۇشىن دە، جالپى قالا ازاماتتارى ءۇشىن دە كوركەم جەرگە اينالادى دەپ كۇتىلىپ وتىر.
«مۇندا مۋزىكاعا، تەاترعا ارنالعان زال جانە بالالار مەن ەرەسەكتەرگە ارنالعان وقۋ بولمەلەرى، كىتاپحانا، مەيرامحانا، دۇكەن جانە ۆيدەوزالدار بولادى»، - دەدى ونەرتانۋشى مەرۋەرت قالييەۆا.
اتالعان مۇراجاي ءال-فارابي جانە نازاربايەۆ داڭعىلدارىنىڭ قيىلىسىندا ورنالاسادى. ونەر كەشەنىن جوبالاۋ بويىنشا قىزمەت كورسەتەتىن كومپانيا سان-فرانسيسكو زاماناۋي ونەر مۋزەيى، بيلباوداعى گۋگگەنحايم مۋزەيى، دوحاداعى كاتار يسلام ونەرى مۇراجايى مەن لۋۆر ورتالىقتارى سەكىلدى جوبالاردا جۇمىس ىستەگەن. ال ينجەنەرلىك شەشىمدەردى جاساۋعا 40 جىلدىق تاجىريبەسى بار حالىقارالىق ماماندار تارتىلعان.
«كوپتەگەن قازاقستاندىق ونەر تۋىندىلارىن مەن شەت مەملەكەتتەردە كورىپ، ساتىپ الىپ ءجۇردىم. 90-جىلدارداعى كوركەمسۋرەتتەردى دە پاريج، ماسكەۋ تورىندە ءجيى كەزدەستىرەسىز. ءىستىڭ باسى «وسىلاردىڭ ءبارى نەگە ءوز وتانىمىزدا تۇرماسقا؟» دەگەن ويدان باستالعان. ال، مىنا ورىندى ماعان قالا اكىمى ۇسىنعان ەدى. جالپى ءاۋ باستاعى يدەيانىڭ ءوزى مىقتى بولدى»، - دەدى كاسىپكەر، مەسەنات نۇرلان سماعۇلوۆ.
بۇگىنگى تانىستىرىلىمعا تۇرعىندار دا ارنايى كەلىپ، كورشىلەس اۋماقتا بوي كوتەرەتىن مۇراجايدىڭ جوباسىمەن تانىسىپ قايتتى.
«مىنا جەر تازالانىپ قالدى. ەندى مادەنيەت ورنى بولسا، ءتىپتى جاقسى بولادى. بالا-شاعالارىمىزبەن قىدىرىپ جۇرەمىز»، – دەدى قالا تۇرعىنى نازىم مامانوۆ.
سوڭعى ۇلگى مەن ەرەكشە ديزاينعا ساي جاساقتالاتىن نىساننىڭ قۇرىلىسى قاراشا ايىندا باستالادى. كوركەمونەر تۋىندىلارىنىڭ باسىن قوسقان ورىن 2023 جىلى قولدانۋعا بەرىلەدى دەپ جوسپارلانىپ وتىر.