الماتىدا «ۇزدىك ءبىلىم بەرۋ ۇيىمى» بايقاۋىنىڭ جەڭىمپازى ماراپاتتالدى. المالى اۋدانىنداعى س.ا.قوجىقوۆ اتىنداعى №39 مامانداندىرىلعان ليسەي ەڭ جوعارى بالل (1671،43) الدى، دەپ حابارلايدى almaty-akshamy.kz
جەڭىمپازعا ءبىلىم بەرۋ ۇيىمىن ماتەريالدىق-تەحنيكالىق جاراقتاندىرۋدى جاقسارتۋ جانە ءبىلىم بەرۋ ۇدەرىسىن عىلىمي-ادىستەمەلىك قامتاماسىز ەتۋ ءۇشىن الماتى قالاسى اكىمىنىڭ 56 ملن تەڭگە كولەمىندەگى گرانتى بەرىلدى. بايقاۋ كوميسسياسىنىڭ قۇرامىنا قالا اكىمىنىڭ ورىنباسارى، ءبىلىم باسقارماسىنىڭ وكىلدەرى، ءبىلىم بەرۋ ارداگەرلەرى، رەسپۋبليكالىق ءبىلىم بەرۋ ۇيىمدارىنىڭ، قوعامدىق ۇيىمداردىڭ ديرەكتورلارى جانە ت.ب. كىردى.
2023 جىلى بايقاۋ ەكى كەزەڭدە وتكىزىلدى: اۋداندىق كەزەڭ – 26 ساۋىردەن 5 مامىرعا دەيىن جانە قالالىق كەزەڭ – 10 مامىردان 30 ماۋسىمعا دەيىن. ءبىرىنشى كەزەڭدە اۋدانداردان سەگىز ورتا ءبىلىم بەرۋ ۇيىمى ۇسىنىلدى. ولاردىڭ ىشىندە: الاتاۋ اۋدانىنىڭ №180 جالپى ءبىلىم بەرەتىن مەكتەبى؛ الاتاۋ اۋدانىنىڭ № 201 مەكتەپ-گيمنازياسى؛ المالى اۋدانىنىڭ س.ا.قوجىقوۆ اتىنداعى №39 مامانداندىرىلعان ليسەيى؛ اۋەزوۆ اۋدانىنىڭ ا.بايتۇرسىنوۆ اتىنداعى №139 مەكتەپ-گيمنازياسى؛ بوستاندىق اۋدانىنىڭ ماحاتما گاندي اتىنداعى №92 مامانداندىرىلعان ليسەيى؛ جەتىسۋ اۋدانىنىڭ ءسۇيىنباي اتىنداعى № 143 مەكتەپ-ليسەيى؛ ناۋرىزباي اۋدانىنىڭ №174 مەكتەپ-گيمنازياسى؛ تۇركسىب اۋدانىنىڭ №198 جالپى ءبىلىم بەرەتىن مەكتەبى.
جەڭىمپاز بىرنەشە كريتەريي بويىنشا تاڭدالدى. ولاردىڭ ىشىندە: تەحنولوگيالاردى وقۋ ۇدەرىسىنە ەنگىزە ءبىلۋ، مۇعالىمدەردىڭ ءوزىن-وزى جۇزەگە اسىرۋىنا جاعدايدىڭ بولۋى جانە وقۋشىلاردىڭ وقۋدا جوعارى كورسەتكىشتەرى. ءار كريتەريي ءۇشىن وقۋ ورنى بالل الدى.
«ورتا ءبىلىم بەرۋدىڭ ۇزدىك ۇيىمى» بايقاۋىنىڭ جەڭىمپازىن سالتاناتتى ماراپاتتاۋ 2023 جىلعى 6 قازاندا Almaty تەاترىندا ءوتتى جانە مۇعالىمدەر كۇنىنە ورايلاستىرىلدى.