الماتىنىڭ قالا قۇرىلىسىن باقىلاۋ باسقارماسى ءال-فارابي داڭعىلىنىڭ سولتۇستىگىندە، مەڭدىقۇلوۆ بۋلۆارىنىڭ باتىسىندا اياقتالماعان كوپدەڭگەيلى پاركينگتى بۇزۋ تۋرالى حابارلايدى.
2007 جىلى «سەرت» اق جالعا الۋ ۋچاسكەسىندە 5 دەڭگەيلى پاركينگ سالۋعا كىرىسكەن ەدى.
2009 جىلدىڭ اياعىنان باستاپ قۇرىلىس-مونتاج جۇمىستارى 1-2 قابات دەڭگەيىندە توقتاپ قالدى.
2015 جىلى ۋاقىتشا جەر پايدالانۋ قۇقىعى دا توقتاتىلدى، سودان كەيىن «سەيسموسترويزاششيتا» ج ش س ماماندارى وبەكتىنىڭ تىرەك جانە قورشاۋ كونسترۋكسيالارىنا تەكسەرۋ جۇرگىزدى.
ساراپشىلار نەگىزگى تىرەك كونسترۋكسيالارىنىڭ تەحنيكالىق جاي-كۇيى تۋرالى قورىتىندى بەردى، زەرتتەۋ ناتيجەلەرى بويىنشا قولدانىستاعى كونسترۋكسيالاردى بولشەكتەۋ ۇسىنىلدى.
باسقارمادان كەيىن سوتقا اياقتالماعان وبەكتىنى بۇزۋ تۋرالى تالاپ ارىز بەرىلدى. سوتتىڭ 2018 جىلعى 25 ساۋىردەگى قاۋلىسىمەن تالاپ - ارىزدار قاناعاتتاندىرىلدى.
اياقتالماعان نىساندى بولشەكتەۋ بۇگىن باستالدى. ايتا كەتۋ كەرەك، بۇل مەدەۋ اۋدانىندا بولشەكتەلگەن ەكىنشى نىسان.
سونداي-اق، سوتتىڭ شەشىمى بويىنشا رادلوۆ كوشەسى، 9/1 ۋچاسكەسى بويىنداعى اياقتالماعان عيماراتتى بۇزۋ دا باستالدى.
ەستەرىڭىزگە سالا كەتەيىك، الماتى اكىمى ەربولات دوسايەۆتىڭ قۇرىلىستى باقىلاۋدى كۇشەيتۋ جونىندەگى تاپسىرماسى اياسىندا 2023 جىلدىڭ باسىنان بەرى 65 زاڭسىز نىسان، ونىڭ ىشىندە «مەچتا»، KHAN جانە باسقا دا تۇرعىن ءۇي كەشەندەرى تولىعىمەن نەمەسە ءىشىنارا بۇزىلعان بولاتىن.