الماتىدا وسى اپتادا 20 جىل بويى كوپتەن كۇتكەن وقيعا ورىن الماق. «مەدەۋ» مۇز ايدىنىنىڭ تاريحي ارەناسىندا اتى اڭىزعا اينالعان «ازيا داۋىسى» فەستيۆالىنىڭ فانفارى قايتا شىرقالىپ، ءۇش كۇندىك مەرەكە وتەدى.
بۇل فەستيۆال بۇرىنعىدان وزگەشە. ءداستۇرلى حالىقارالىق ورىنداۋشىلار بايقاۋى بولمايدى. بۇل – جاڭعىرۋ كونسەرتى. بايقاۋدىڭ ءۇش كۇنى تاقىرىپتىق ماعىناسىنا قاراي ءبولىنىپ تاستالىندى.
فەستيۆالدىڭ اشىلۋى مەن ءبىرىنشى كۇنىنە Forbes Kazakhstan نۇسقاسى بويىنشا 30 جاسقا دەيىنگى تالانتتار رەيتينگىنىڭ قاتىسۋشىسى ازات ابىكەن باسقاراتىن Green Case Event كومپانياسى جاۋاپتى بولادى. قازاق ونەرىنىڭ اڭىزى بيبىگۇل تولەگەنوۆا ءبىرىنشى بولىپ ساحناعا كوتەرىلەدى. ودان كەيىن حالىق الدىندا زاماناۋي قازاق ەستراداسىنىڭ بەلدى ارتىستەرى – مولدانازار، RaiM، ەركە ەسماحان، V$XV PRINCE، ميراس جۇگىنىسوۆ، مارحابا ءسابي، ORYNKHAN، يرينا كايراتوۆنا، ZAQ سىندى ونەرپازدار شىقپاق.
ءبىرىنشى كۇن اسا ايرىقشا بولماق. سەبەبى، ءبىز قىزىل كىلەمى توسەلگەن اشىلۋ سالتاناتىن، اتى اڭىزعا اينالعان A-Studio توبىنىڭ ميۋزيكلىنىڭ ءتۇسىرىلىمىن كورەمىز. ءبىرىنشى كۇنگى كونسەرت تاڭقالارلىق درون شوۋىمەن اياقتالادى.
فەستيۆالدىڭ ەكىنشى كۇنى – ساحنادا BLACK EYED PEAS! Will.I.Am، Taboo جانە apl.de.ap كورەرمەندەر الدىنا الەمدى تاڭقالدىراتىن حيتتەرىمەن شىعادى. ولاردىڭ ەنەرگياسى مەدەۋدى جاراتىنى ءسوزسىز.
فەستيۆالدىڭ ءۇشىنشى جانە سوڭعى كۇنى اڭىزدار مەن ۇرپاقتار ساباقتاستىعى يدەياسىن قوزعايدى. ورتالىق ازيا جۇلدىزدارى – روزا رىمبايەۆا، ناعيما ەسقالييەۆا، ءجاميلا سەركەبايەۆا، ەركەش شاكەيەۆ، مەدەۋ ارىنبايەۆ، ەرلان كوكەيەۆ، ءادىل چەكيلوۆ، پارۆيز نازاروۆ، جىلدىز وسمونالييەۆا، باۋىرجان يسايەۆ، «دارا» توبى ونەر كورسەتپەك. ال ءادىل چەكيلوۆ پەن پارۆيز نازاروۆ، ناعيما ەسقالييەۆا مەن دياس ابىلايەۆ، روزا رىمبايەۆا ەكى ۇلى ءمادي رىمبايەۆ پەن ءالي وقاپوۆپەن بىرگە دۋەت قۇرماق!
ماۋسىم ايىندا الماتى قالاسىندا وتكەن «جاس قانات» بايقاۋىنىڭ جەڭىمپازدارى ۇرپاقتار اراسىنداعى ساباقتاستىقتىڭ بەلگىسى بولماق. ءبىر سوزبەن ايتقاندا، «جاس قانات» بايقاۋىن كورمەسەڭىز، «ازيا داۋىسى» فەستيۆالىنىڭ ارقاسىندا ونىڭ ۇزدىك قاتىسۋشىلارىمەن تانىسۋعا تاماشا مۇمكىندىك بار. ال ءۇشىنشى كۇننىڭ باستى حەدلاينەرلەرى – ياللا جانە Secret Service توپتارى. سونداي-اق، كونسەرتتىڭ ءۇشىنشى كۇنى كورەرمەندەرگە تاعى ءبىر توسىنسىي ۇسىنىلماق. 30 شىلدەدە وتەتىن كونسەرتكە بيلەت العانداردىڭ اراسىندا Chevrolet Onix كولىگى ويناتىلادى. Allur Auto ۇسىنعان بۇل ۇتىس ويىنى فەستيۆالگە كەلۋشىلەرگە تاڭعاجايىپ ەموسيالاردى باستان كەشىرىپ، اۆتوكولىك ۇتىپ الۋ مۇمكىندىگىن سىيلايدى.
الماتى قالاسىنىڭ اكىمدىگى كورەرمەندەردىڭ مەدەۋگە وڭاي جەتىپ، قالاعا قينالماي ورالۋىن قامتاماسىز ەتەدى. سوندىقتان فەستيۆال كەزىندە قوسىمشا اۆتوبۋس باعىتى ىسكە قوسىلادى. ساتبايەۆ پەن بايتۇرسىنوۆ كوشەلەرىنىڭ قيىلىسىنان اۆتوبۋستار ساعات 14.00-دەن 24.00-گە دەيىن 10–15 مينۋت ارالىقپەن جۇرەتىن بولادى. ءبىر باعىتقا «وڭاي» كارتاسىنسىز، جول ءجۇرۋ قۇنى – 150 تەڭگە. سونىمەن قاتار، بارلىق كەلۋشىلەردىڭ قاۋىپسىزدىگىن قامتاماسىز ەتۋ ءۇشىن پوليسيا، ءورت ءسوندىرۋ جانە جەدەل جاردەم قىزمەتى كۇشەيتىلەدى.
«ازيا داۋىسى» فەستيۆالىنە «Alatau Aqparat» مەدياحولدينگىنىڭ قۇرامىنا كىرەتىن «Almaty aqshamy» مەن «ۆەچەرنيي الماتى» گازەتتەرى مەن سايتتارى اقپاراتتىق قولداۋ كورسەتەتىن بولادى.