28 شىلدەدە قىتايدىڭ وڭتۇستىك-باتىسىنداعى سىچۋان پروۆينسياسىنىڭ چەندۋ قالاسىندا 31ء-شى دۇنيەجۇزىلىك جازعى ۋنيۆەرسيادا باستالادى.
سپورتتىق شارا 8 تامىزعا دەيىن جالعاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
چەندۋدەگى ۋنيۆەرسيادا 2021 جىلى ءوتۋى كەرەك ەدى، ءبىراق COVID-19 پاندەمياسىنا بايلانىستى ءبىر جىلعا شەگەرىلدى. پاندەميا سالدارىنان 2022 جىلى دا ۇيىمداستىرىلمادى. 2022 جىلدىڭ ماۋسىم ايىندا حالىقارالىق ستۋدەنتتىك سپورت فەدەراسياسىنىڭ (FISU) اتقارۋشى كوميتەتى جارىستىڭ جاڭا داتاسىن بەلگىلەدى – 2023 جىلدىڭ 28 شىلدەسى مەن 8 تامىزى ارالىعى. ۋنيۆەرسيادا 2023 جىلى وتەتىنىنە قاراماستان، باستاپقى «چەندۋ 2021» اتاۋى ساقتالادى. چەندۋ-2021 ويىندارىندا دۇنيەجۇزى ۋنيۆەرسيتەتتەرىنىڭ ستۋدەنتتەرى سپورتتىڭ 18 تۇرىنەن 269 مەدال جيىنتىعى ءۇشىن سىنعا تۇسەدى. ۇيىمداستىرۋ كوميتەتىنىڭ وكىلدەرى ۋنيۆەرسياداعا جۇمىلدىرىلاتىن 49 ستاديون ەكى جىل بۇرىن پايدالانۋعا بەرىلگەنىن ايتتى. بيىل سپورت نىساندارىن قابىلداۋ جانە سىناقتان وتكىزۋ جۇمىستارى جۇرگىزىلدى، ولاردىڭ بارلىعى ستاندارتقا ساي جانە حالىقارالىق جارىستاردى وتكىزۋگە جارامدى. سپورتتىق شاراعا 20 مىڭنان استام ۆولونتەر تارتىلعان.
قازاقستاننىڭ 90 سپورتشىدان تۇراتىن ستۋدەنتتىك كومانداسى سپورتتىڭ 10 تۇرىنە قاتىسادى: ساداق اتۋ، گيمناستيكا، جەڭىل اتلەتيكا، سەمسەرلەسۋ، دزيۋدو، ءجۇزۋ، ۇستەل تەننيسى، تاەكۆوندو، وق اتۋ جانە ۋشۋ.
چەندۋدەگى جازعى ۋنيۆەرسيادانىڭ اشىلۋ سالتاناتىنا قحر ءتوراعاسى سي سزينپين قاتىساتىنى كۇتىلەدى. جۇڭگو وسىمەن ءۇشىنشى رەت دۇنيەجۇزىلىك جازعى ۋنيۆەرسيادانى وتكىزگەلى وتىر. بۇعان دەيىنگى ويىندار 2001 جىلى بەيجىڭدە جانە 2011 جىلى شەنچجەندە وتكەن ەدى.