2022 جىلدان باستاپ الماتىدا كوگالداندىرۋدىڭ اۋقىمدى باعدارلاماسى اياسىندا شامامەن 1،2 ملن اعاش وتىرعىزىلدى. وسى ءىس-شارالاردىڭ تيىمدىلىگىن ارتتىرۋ ءۇشىن قالادا جاسىل جەلەكتەردى وتىرعىزۋ مەن كۇتۋگە قويىلاتىن تالاپتار ايتارلىقتاي كۇشەيتىلدى.
قالا اكىمى ەربولات دوسايەۆتىڭ باستاماسىمەن 2023 جىلى جاسىل جەلەكتەردى كۇتىپ ۇستاۋ جانە قورعاۋ ەرەجەلەرىنە ەلەۋلى وزگەرىستەر ەنگىزىلدى. تولىققاندى سۋارۋ جۇيەسىن ۇيىمداستىرۋدى، وسىمدىكتەردى بيولوگيالىق قورعاۋدى، سانيتارلىق جانە قالىپتاپ كەسۋدى، سونداي-اق وتىرعىزۋ ماتەريالىنىڭ ساپاسىنا جانە ينفراقۇرىلىم وبەكتىلەرىنەن قاشىقتىقتى ساقتاۋعا قويىلاتىن تالاپتاردى قوسا العاندا، سۋارۋ نورمالارى العاش رەت بەكىتىلدى.
وتەمدىك ەكپەلەرگە ەرەكشە نازار اۋدارىلادى: ەندى ءۇش جىل بويى مىندەتتى كۇتىممەن 2،5 مەتردەن تومەن ەمەس جاپىراقتى اعاشتار جانە 2 مەتردەن تومەن ەمەس قىلقان جاپىراقتى اعاشتار وتىرعىزىلادى. ال 2025 جىلدان باستاپ الماتىدا بيىكتىگى 4-تەن 6 مەترگە دەيىنگى ءىرى كوشەتتەردى وتىرعىزۋ باستالدى. وسى جىلدىڭ باسىنان باستاپ الماتىدا كۇل، ليپا، كۇمىس ۇيەڭكى، ستاندارتتى قاراعاش، قاراعاي، كوك جانە جاسىل شىرشالاردى قوسا العاندا بيىكتىگى 6 مەتردەن اساتىن 2 مىڭنان استام ءىرى اعاش وتىرعىزىلدى. سونداي-اق، بيىكتىگى 2،5 مەتردەن اساتىن 20 مىڭعا جۋىق كوشەت جانە 10 مىڭنان استام بۇتا وتىرعىزىلدى.
سۋارۋدى قامتاماسىز ەتۋگە كوپ كوڭىل بولىنەدى. ەكى جىل ىشىندە قالادا 500 شاقىرىم اۆتوسۋارۋ جانە تامشىلاتىپ سۋارۋ جەلىلەرى سالىندى، 2025 جىلى تاعى 290 شاقىرىم سالۋ جوسپارلانۋدا، بۇل 1 ملن اعاشقا دەيىن سۋارۋدى قامتاماسىز ەتۋگە مۇمكىندىك بەرەدى.
جاسىل كەڭىستىكتەرگە كۇتىم جاساۋدىڭ جاڭارتىلعان تاسىلدەرىنىڭ ناتيجەسىندە كوشەتتەردىڭ ءومىر ءسۇرۋ دەڭگەيى ايتارلىقتاي ءوستى، 2022 جىلى 70 پايىزدان 2024 جىلى 90 پايىزعا دەيىن.
سونىمەن قاتار، جاسىل جەلەكتەرى بار اۋماقتاردا جۇمىس ىستەيتىن قۇرىلىس كومپانيالارى ولاردى ساقتاۋ بويىنشا جاڭا تالاپتاردى ورىنداۋعا مىندەتتى. ەرەجەلەردى بۇزۋ اكىمشىلىك جاۋاپكەرشىلىككە اكەلۋى مۇمكىن.
قالا اكىمدىگىنىڭ جوبالىق كەڭسەسىنىڭ قولداۋىمەن جۇزەگە اسىرىلىپ جاتقان وسى شارالاردىڭ بارلىعى جاس اعاشتاردىڭ قۇلاۋ دەڭگەيىن 10% - عا دەيىن تومەندەتۋگە مۇمكىندىك بەردى جانە قالانىڭ تۇراقتى، سالاۋاتتى جاسىل ينفراقۇرىلىمىن قۇرۋعا جانە قالالىق ورتانىڭ ساپاسىن ارتتىرۋعا باعىتتالعان.