الماتىدا ءۇش جىل ىشىندە ونداعان مىڭ تۇرعىننىڭ سۋ جانە ەلەكترمەن قامتىلۋ ساپاسى جاقساردى
سوڭعى ءۇش جىلدا الماتى قالاسىنىڭ اكىمى ەربولات دوسايەۆتىڭ باسشىلىعىمەن ينفراقۇرىلىمعا قاتىستى كوپتەگەن ماسەلە شەشىمىن تاپتى: قالادا 538 شاقىرىم سۋ قۇبىرى جانە كارىز جۇيەلەرى جاڭادان سالىنىپ، قايتا جاڭعىرتىلدى، ەنەرگەتيكا سالاسىندا ءىرى جوبالار جۇزەگە اسىرىلدى، دەپ حابارلايدى aqshamnews.kz
بۇل جاڭا تۇرعىن الاپتارىن ورتالىقتاندىرىلعان جۇيەلەرگە قوسۋعا جانە بۇرىننان بار اۋداندارداعى، سونىڭ ىشىندە الاتاۋ، ناۋرىزباي جانە جەتىسۋ اۋداندارىنداعى قىزمەت كورسەتۋدىڭ سەنىمدىلىگىن ارتتىرۋعا مۇمكىندىك بەردى.
سونىمەن قاتار، ەلەكترمەن جابدىقتاۋ سالاسىندا دا اۋقىمدى جوبالار بەلسەندى تۇردە ىسكە اسىرىلىپ جاتىر. 2022 جىلى 138 شاقىرىم ەلەكتر جەلىلەرى جاڭعىرتىلدى. 2023 جىلى قۋاتى 100 مۆت بولاتىن جاڭا «الماگۇل» قوسالقى ستانسياسى سالىندى، ول قالانىڭ وڭتۇستىك بولىگىندەگى شامامەن 200 مىڭ تۇتىنۋشىنى ەلەكتر قۋاتىمەن قامتاماسىز ەتتى. بۇعان قوسا، قالانىڭ بەس اۋدانىندا جالپى ۇزىندىعى 197،97 شاقىرىم جەلى قايتا جاڭارتىلدى.
2024 جىلى المااراسان، كوكشوقى، ەرمەنساي، المەرەك جانە قايرات سياقتى جاڭا شاعىن اۋدانداردى ەلەكترمەن قامتۋ جۇمىستارى باستالدى. تۇركسىب اۋدانىندا قۋاتى 80 مۆت بولاتىن قوسالقى ستانسيانىڭ قۇرىلىسى جالعاسىپ جاتىر. جالپى، 2024 جىلى 223 شاقىرىم اۋە جانە كابەلدىك جەلىلەر تارتىلدى، بۇل ەلەكتر جەلىلەرىنىڭ توزۋ دەڭگەيىن 64،5%-عا دەيىن تومەندەتۋگە جانە 200 مىڭنان استام تۇتىنۋشىنى ۇزدىكسىز ەلەكترمەن قامتاماسىز ەتۋگە مۇمكىندىك بەردى.
2025 جىلى جەتى جاڭا جوبانى ىسكە اسىرۋ جوسپارلانعان، ونىڭ ىشىندە 110/6-10 كۆ كەرنەۋلى پس قوسالقى ستانسياسى مەن ءۇش تاراتۋ قوسالقى ستانسياسىنىڭ قۇرىلىسى بار. جەلىلەردىڭ جالپى ۇزىندىعى 123 شاقىرىم بولادى، بۇل جەلىلەردىڭ توزۋىن 63،3%-عا دەيىن ازايتىپ، مەدەۋ، جەتىسۋ، تۇركسىب جانە الاتاۋ اۋداندارىندا ەلەكترمەن جابدىقتاۋدىڭ سەنىمدىلىگىن ارتتىرۋعا مۇمكىندىك بەرەدى.
ينجەنەرلىك ينفراقۇرىلىمدى جاڭعىرتۋ جۇمىستارى جۇيەلى جانە كەزەڭ-كەزەڭىمەن – مەملەكەت باسشىسىنىڭ تاپسىرمالارى مەن الماتى قالاسىنىڭ تۇراقتى دامۋ جوسپارىنا سايكەس جۇرگىزىلىپ وتىر.