35 جاستاعى ەر ادام تەك جەكە سەكتوردا جانە تۇندە عانا ۇرلىق جاساۋمەن اينالىسقان.
مۇنداي دەرەكتى الماتى قالاسى مەدەۋ اۋداندىق پوليسياسى كەلتىرگەن، دەپ حابارلايدى aqshamnews.kz.
– تەرگەۋدىڭ وسى كەزەڭىندە كۇدىكتىنىڭ ۇرلىقتىڭ ءۇش دەرەگىنە قاتىسى بار ەكەنى بەلگىلى بولدى. ول ونىڭ ەكەۋىن دۋمان شاعىن اۋدانىندا جاساعان. ءبىرىنشى جاعدايدا ەر ادام جەكە تۇرعىن ءۇيدىڭ اۋلاسىنان ۆەلوسيپەد ۇرلاپ كەتسە، ەكىنشىسىندە كولىكتىڭ ىشىنەن 1،2 ملن تەڭگەنى جىمقىرعان. ەپيزودتاردىڭ كوپشىلىگىندە كۇدىكتى بوتەن ادامداردىڭ اۋلالارىنا قۇلىپتانباعان قاقپالاردى ەركىن اشىپ كىرگەن. بۇل جەكە سەكتورعا ءتان بولۋى مۇمكىن، ءبىراق ءقاۋىپسىز ەمەس. سوندىقتان وسى ءساتتى پايدالانا وتىرىپ، ازاماتتاردى مۇلىكتىك قاۋىپسىزدىك شارالارىن كۇشەيتۋگە شاقىرامىن، – دەدى مەدەۋ اۋداندىق پب-عا قاراستى پوليسيا ءبولىمىنىڭ باستىعى ءابدىنۇر تاسىبايەۆ.