الماتىدا ۇرلىق جاساعان شەتەلدىك ۇستالدى

ول ەكى كۇندە التى رەت بوتەننىڭ مۇلكىن ۇرلاعان.

الماتىدا قىرعىزستان ازاماتى جاڭا جىل الدىنداعى ابىگەردى پايدالانىپ قالتا ۇرلىعىن جاساپ جۇرگەن، دەپ حابارلايدى Almaty-akshamy.kz Polisia.kz-كە سىلتەمە جاساپ.

بۇل تۋرالى المالى اۋداندىق پوليسيا باسقارماسى حابارلادى. اتالعان بولىمشەنىڭ جەدەل قىزمەتكەرلەرى وتكەن كۇنى تاجىريبەلى «قالتا ۇرىسىن» ۇستادى.

«ساۋدا ۇيلەرى مەن سۋپەرماركەتتەردە 34 جاستاعى ك. ەسىمدى ازامات ۇرلىق جاساپ جۇرگەن. ءبىزدىڭ اۋداندا بار بولعانى ەكى كۇننىڭ ىشىندە قاسكوي التى رەت بوتەننىڭ مۇلكىن ۇرلاعان. ول نەگىزىنەن ۇيالى تەلەفونداردى ۇرلاعان، ولاردى، ادەتتە، ۇزاق ۋاقىت بويى سورەلەردى قاراپ جۇرەتىن ايەلدەردەن عانا جىمقىرعان. وسى كەزدە جەڭىل اقشانى ۇناتاتىن جىگىت، كۇرتەشەلەرىنىڭ قالتاسىنان بىلدىرمەي گادجەتتەرىن شىعارىپ الىپ، جاسىرىنىپ قالعان. ايىپتالۋشى ءقازىر قاماۋدا وتىر. ونىڭ جەكە باسىنىڭ باسقا دا ۇرلىققا قاتىسى بار-جوعىنا تەكسەرىپ جاتىرمىز – ول قالانىڭ باسقا دا جەرلەرىندە ۇرلىق جاساپ جۇرگەن بولۋى مۇمكىن»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.