الماتىدا ءۇندى شتامىن جۇقتىرعان كىم؟

بۇل سۇراققا قالانىڭ باس سانيتارى جانداربەك بەكشين جاۋاپ بەردى.

وسى جايىندا الماتى قالاسى وڭىرلىك كوممۋنيكاسيالار قىزمەتىنىڭ الاڭىندا  وتكەن «اعىمداعى ەپيدەميولوگيالىق جاعداي جانە COVID-19-دىڭ تارالۋىن الدىن الۋ شارالارى» تاقىرىبىندا ونلاين باسپاسوز-كونفەرەنسياسىندا باس سانيتار ءمالىم ەتتى، دەپ حابارلايدى Almaty-akshamy.kz. 

«كەشە، 22 ماۋسىم كۇنى، كەشكە «دەلتا» شتاممىنىڭ بولۋ مۇمكىندىگى انىقتالدى. ءبىز ونى بۇگىن تاعى ءبىر رەت راستادىق. مۋتاسيالانعان دەلتا شتاممىنىڭ شىنىمەن دە اينالىمدا بار ەكەنى بەلگىلى بولدى»، - دەدى ول. 

سونىمەن قاتار، ول اتالعان شتامدى كىم جۇقتىرعانىن اتاپ ءوتتى. 

«ول - 1984 جىلى تۋعان ك. ەسىمدى ازاماتشا. ءۇي شارۋاسىنداعى ايەل، ەش جەردە جۇمىس ىستەمەيدى. ونىڭ كۇيەۋى شەتەلدە ءىسساپاردا ءجۇر. ايتا كەتۋ كەرەك، ونىڭ جولداسى اقپان ايىندا كوروناۆيرۋسپەن اۋىرعان. ال ناۋقاستىڭ ءوزى ءقازىر اۋرۋحانادا جاتىر. ونىمەن بايلانىس جاساعان جەتى ادام وقشاۋلاندى. ەپيدەميولوگيالىق تەكسەرۋ جۇرگىزىلىپ جاتىر. ازىرگە ونىڭ بۇل شتاممدى ناقتى قاي جەردە جۇقتىرعانى بەلگىسىز. ول كىسى بىرنەشە نىساندا بولعان. ول جەرلەر باقىلاۋعا الىندى»، - دەدى جانداربەك بەكشين.