قازاقستان پوليسياسى كۇنى: ىشكى ىستەر ءمينيسترى ەرلان تۇرعىمبايەۆ ءىىو قىزمەتكەرلەرى مەن ارداگەرلەرىن قۇتتىقتادى
بۇگىن قازاقستاندىق ءتارتىپ ساقشىلارى وزدەرىنىڭ كاسىبي مەرەكەلەرى – پوليسيا كۇنىن اتاپ وتۋدە، – دەپ حابارلايدى Almaty-akshamy.kz Polisia.kz cايتىنداعى حابارعا سىلتەمە جاساپ.
1992 جىلى 23 ماۋسىمدا قازاقستان رەسپۋبليكاسىنىڭ جوعارعى كەڭەسى “قازاقستان رەسپۋبليكاسىنىڭ ىشكى ىستەر ورگاندارى تۋرالى” زاڭىن قابىلدادى. وندا قازاقستاندىق پوليسيانىڭ مىندەتتەرى مەن فۋنكسيالارى ايقىندالدى. 2007 جىلى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ جارلىعىمەن 23 ماۋسىم - پوليسيا كۇنى بولىپ بەكىتىلدى. ىشكى ىستەر ءمينيسترى ەرلان تۇرعىمبايەۆ ەلىمىزدىڭ بارلىق پوليسيا قىزمەتكەرلەرىن كاسىبي مەرەكەسىمەن قۇتتىقتادى.
“قۇرمەتتى ارداگەرلەر، ارىپتەستەر! بارشاڭىزدى قازاقستان پوليسياسى كۇنىمەن شىن جۇرەكتەن قۇتتىقتايمىن. تاۋەلسىزدىك العالى ىشكى ىستەر ورگاندارىنىڭ قىزمەتكەرلەرى ەلىمىزدە قوعامدىق ءتارتىپتى قامتاماسىز ەتىپ، ازاماتتاردىڭ قۇقىقتارىن ساقتاۋ جولىندا قىزمەت ەتۋدە. مەملەكەت باسشىسى ىشكى ىستەر ورگاندارىنىڭ جۇمىسىنا ەرەكشە كوڭىل ءبولىپ وتىر. حالىقتىڭ پوليسياعا سەنىمىن ارتتىرۋ ءۇشىن، سەرۆيستىك مودەلگە كوشۋ جالعاسۋدا. ۆەدومستۆولىق ءبىلىم بەرۋ جۇيەسىنە رەفورما جۇرگىزىلدى. قىزمەتكەرلەردىڭ الەۋمەتتىك جانە ماتەريالدىق جاعدايى جاقساردى. جالاقى كوتەرىلىپ، تۇرعىن ۇيگە وتەماقى الاتىن قىزمەتكەرلەر سانى ءوستى. بۇل پوليسيا قىزمەتكەرلەرىنەن جوعارى جاۋاپكەرشىلىكتى جانە قىزمەتتىك مىندەتتەرىن ادال اتقارۋدى تالاپ ەتەدى. توتەنشە جاعداي مەن كارانتين كەزىندە قىزمەتكەرلەر تەك وزدەرىنىڭ تىكەلەي مىندەتىن اتقارىپ قانا قويماي، ادامداردىڭ ءومىرى مەن دەنساۋلىعىن قورعاۋ ءۇشىن دارىگەرلەرمەن بىرگە الدىڭعى شەپتە ءجۇردى. ەلدەگى قاۋىپسىزدىكتى قامتاماسىز ەتۋگە بار كۇشىن سالعان قىزمەتكەرلەردىڭ ەڭبەگى جوعارى باعالاندى. تاۋەلسىزدىك العاننان باستاپ، 1،5 مىڭ قىزمەتكەر مەملەكەتتىك ناگرادامەن ماراپاتتالدى.
وكىنىشكە وراي، تاۋەلسىزدىك جىلدارى قىزمەتتىك بورىشىن ورىنداۋ كەزىندە 802 قىزمەتكەر قازا تاۋىپ، 2650 ادام جاراقات الدى. ءبىز انتقا ادال بولعان ارىپتەستەردى ەشقاشان ۇمىتپايمىز. باتىرلارىمىزدىڭ رۋحىنا ماڭگىلىك تاعزىم!
ارداگەرلەرىمىزدىڭ دە پوليسيانىڭ دامۋىنا قوسقان ەڭبەگى ەرەكشە. جاس قىزمەتكەرلەردى تاربيەلەپ، جاڭا فورماتتاعى پوليسيانىڭ بەينەسىن قالىپتاستىرۋعا قوسقان ۇلەسى ءۇشىن ۇلكەن العىس بىلدىرەمىن. قۇرمەتتى ارداگەرلەر جانە ارىپتەستەر! بۇگىنگى كاسىبي مەرەكە كۇنى سىزدەردىڭ وتباسىلارىڭىزعا زور دەنساۋلىق، باقىت پەن بايلىق، وتانىمىز – قازاقستان رەسپۋبليكاسىن وركەندەتۋ جولىنداعى قىزمەتتەرىڭىزگە تابىس تىلەيمىن!” – دەدى ىشكى ىستەر ءمينيسترى ەرلان تۇرعىمبايەۆ قۇتتىقتاۋ سوزىندە.