بۇگىن، 28 ءساۋىر 2025 جىلى، الماتى قالاسىنداعى جامبىل اتىنداعى قازاق مەملەكەتتىك فيلارمونياسىندا جەڭىس مەرەكەسى قارساڭىندا ارداگەرلەردىڭ قاتىسۋىمەن وتكەن ەرەكشە گالا-كونسەرت ۇيىمداستىرىلدى. بۇل تۋرالى Aqshamnews.kz سايتى حابارلايدى. ءىس-شارا الماتى قالاسى اكىمدىگىنىڭ قولداۋىمەن، ۇلى جەڭىستىڭ 80 جىلدىعىن كەڭ كولەمدە اتاپ ءوتۋ اياسىندا وتكىزىلدى.
قازاقستان رەسپۋبليكاسى پرەزيدەنتىنىڭ تاپسىرماسىنا سايكەس، بيىل ەل كولەمىندە ۇلى وتان سوعىسىنداعى جەڭىستىڭ 80 جىلدىعى كەڭ اۋقىمدا اتالىپ وتۋدە. وسى مەرەيتويلىق شارالاردىڭ الدىڭعى شەبىندە الماتى قالاسى تۇرعانى انىق. تاريحقا كوز جۇگىرتسەك، الماتى – سوعىس جىلدارىندا «تىل مايدانىنىڭ» ءىرى ورتالىعى بولدى. مۇندا جاساقتالعان ديۆيزيالار، بريگادالار مەن پولكتار مايدان دالاسىندا ەرەكشە ەرلىك تانىتىپ، جەڭىستى جاقىنداتۋعا ەلەۋلى ۇلەس قوستى.
كونسەرت بارىسىندا الماتى قالالىق ارداگەرلەر كەڭەسىنىڭ ءتوراعاسى ا. بيجانوۆ ءسوز سويلەپ، جينالعان قاۋىمدى ۇلى جەڭىس مەرەكەسىمەن قۇتتىقتادى. ول ءوز سوزىندە ۇلى وتان سوعىسىنىڭ قانشالىقتى اۋىر بولعانىن، قازاقستاندىق جاۋىنگەرلەر مەن تىل ەڭبەككەرلەرىنىڭ تەڭدەسسىز ەرلىگىن اتاپ ءوتتى. بيجانوۆتىڭ سوزدەرى كونسەرتتىڭ پاتريوتتىق رۋحىن ودان ءارى ارتتىرا ءتۇستى.
كونسەرت باعدارلاماسى سوعىس تاقىرىبىنداعى جۇرەك تەبىرەنتەرلىك اندەردەن قۇرالدى. بايقاۋ جەڭىمپازدارى – سوعىس جانە ەڭبەك ارداگەرلەرى – ءوز ورىنداۋلارىمەن كورەرمەندەردىڭ ىستىق ىقىلاسىنا بولەندى. سونىمەن بىرگە، فيلارمونيانىڭ تانىمال انشىلەرى دە ساحنا تورىنە شىعىپ، ونەر كورسەتتى. ءاربىر ءان كورەرمەندەردى سول ءبىر اۋىر دا قاھارلى جىلدارعا قايتا ورالتقانداي اسەر قالدىردى.
ءىس-شارا سوڭىندا قالالىق بايقاۋدىڭ جەڭىمپازدارى ارنايى ماراپاتتالدى. سونىمەن بىرگە، سوعىس جانە ەڭبەك ارداگەرلەرىنە ۇلى جەڭىستىڭ 80 جىلدىعىنا ارنالعان مەرەكەلىك مەدالدار تابىس ەتىلدى. بۇل ماراپاتتار – ولاردىڭ ەرلىگى مەن ەڭبەگىنە دەگەن شىنايى العىس پەن قۇرمەتتىڭ بەلگىسى.
الماتىدا وتكەن بۇل گالا-كونسەرت — ۇلت جادىسىندا ساقتالاتىن تاريحي وقيعالاردىڭ ۇرپاق ساناسىنان وشپەيتىندىگىن تاعى ءبىر مارتە دالەلدەدى. وسىنداي ءىس-شارالار ارقىلى ءبىز باتىر بابالارىمىزدىڭ رۋحىنا تاعزىم ەتىپ، جاس ۇرپاقتىڭ بويىندا وتانسۇيگىشتىك پەن تاريحقا دەگەن قۇرمەتتى قالىپتاستىرامىز.
