الماتىدا قازاقستان حالقى بىرلىگى كۇنى مەن قازاقستان حالقى اسسامبلەياسىنىڭ 30 جىلدىعىنا ارنالعان «قازاقستان — ورتاق ءۇيىمىز» اتتى مەرەكەلىك ءىس-شارا بولىپ ءوتتى.
اتالمىش شارانى الاتاۋ اۋدانىنداعى «شاپاعات» ىقشاماۋدانىندا ورنالاسقان №151 جالپى ءبىلىم بەرەتىن مەكتەپ پەن الماتى قالاسىنداعى دۇنگەندەر قوعامىنىڭ ەتنومادەني ورتالىعى جانىنداعى انالار كەڭەسى بىرلەسىپ ۇيىمداستىردى.
الماتى-ۇلتتار دوستىعى مەن كەلىسىمنىڭ ورتالىعى. بۇگىندە مۇندا بىرنەشە ۇلت مەكەن ەتەدى. سوندىقتان بۇل تەك ءبىر وقۋ ورنىنىڭ مەرەكەسى عانا ەمەس، ەلىمىزدىڭ تاتۋلىعى مەن شىنايى دوستىعىنىڭ سالتانات قۇرعان كۇنى بولدى. ءبىر شاڭىراق استىندا ءتاتۋ-تاتتى ءومىر ءسۇرىپ جاتقان ءجۇزى باسقا جۇرەگى ءبىر، ءتىلى باسقا تىلەگى بىرنەشە ۇلت وكىلى وزدەرىنىڭ وتانى بولعان قازاقستاندى جىرعا قوسىپ، انگە ارقاۋ ەتتى. اشىق اسپان استىندا وتكەن مەرەكە مادەنيەتتەر مەن داستۇرلەر توعىسىپ، ءبىر-بىرىن تولىقتىراتىن، بەيبىتشىلىك پەن كەلىسىمنىڭ شىنايى كورىنىسىنە اينالعان ساتكە تولى بولدى.
سالتاناتتى مەرەكەنى مەكتەپ باسشىسى تولقىن قارىمساقوۆا اشتى.
"ءبىزدىڭ مەكتەپتە 20 دان استام ۇلتتىڭ وكىلى ءبىلىم الىپ جاتىر. بارلىعى ءبىر اتانىڭ بالاسىنداي، ءبىر قولدىڭ سالاسىنداي. ويتكەنى، ءبىزدىڭ ورتاق مەكەنىمىز-قازاقستان. مەملەكەتتىڭ بىرلىگى بارىنەن بيىك تۇرۋى كەرەك. ءبىز وسىناۋ دارقان دالادا دۇنيەگە كەلدىك، وسىندا ءبىلىم الىپ، ءومىر ءسۇرىپ جاتىرمىز. بەيبىت ەلدىڭ باقىتتى بەسىگىندە تەربەلگەن ءار ۇلتتىڭ بالاسى ەركىن ءبىلىم الىپ، ءوز ۇلتىنىڭ مادەنيەتىن ساقتاپ، وگى دامىتۋىنا بارلىق مۇمكىندىك بار"، -دەيدى مەكتەپ باسشىسى.
كەرەمەت كوڭىل-كۇي سىيلاعان مەرەكەلىك شارادا ءار ۇلتتىڭ بالالارى ءوز حالقىنىڭ مادەنيەتىمەن تانىستىردى. ءار ۇلتتىڭ ءدام-تۇزى، ۇلتتىق ءسالت-داستۇرى كەشتىڭ ارقاۋىنا اينالدى. مەكتەپ وقۋشىلارى سومداعان ساحنالىق كورىنىستەر، ۇلتتىق ءان مەن بي كەش قوناقتارى مەن ىقشاماۋدان تۇرعىندارىنىڭ كوڭىلىنەن شىقتى. كەلەسى كەزەكتە الماتى قالاسى بويىنشا قازاقستان دۇنگەندەر قوعامىنىڭ ءتوراعاسى ابۋباكير ۆوينسە ءوزىنىڭ شىنايى سەزىمىن تەبىرەنىسپەن جەتكىزدى.
"ءبىز –ءارقاشاندا بىرگەمىز. بۇل — جاي عانا ۇران ەمەس، بۇل — ءبىزدىڭ كۇندەلىكتى ومىرلىك ۇستانىمىمىز. قازاقستان — شىنىمەن دە ءبىزدىڭ ورتاق ءۇيىمىز، ءبىز وسى توپىراقتا دۇنيەگە كەلدىك، بالالارىمىز دا وسى ەلدىڭ ازاماتى. مىنە، مىنا باقىتتى بالالار ەرتەڭگى ەل بولاشاعىنىڭ كەپىلى.
"مەنىڭ قىزىم قازاقشا دا، ورىسشا دا، دۇنگەن تىلىندە دە سويلەيدى. بۇگىنگى ءىس-شارادا ول دۇنگەن ءبيىن بيلەدى. ءبىز ءۇشىن بۇل ۇلكەن ماقتانىش. وسىنداي ورتادا ءوسىپ كەلە جاتقان ۇرپاق – ەلىمىزدىڭ ەڭ باستى بايلىعى"، - دەيدى «شاپاعات» ىقشاماۋدانىنىڭ تۇرعىنى، ءۇش بالانىڭ اناسى ايناگۇل باقىتبەك قىزى. وسىناۋ كەشتىڭ وتۋىنە ۇيتقى بولعان مەكتەپ باسشىسى تولقىن تۇرسىنقۇل قىزى مەن الماتى قالاسى دۇنگەن ورتالىعى انالار كەڭەسىنىڭ ءتورايىمى ريمما ماسىروۆاعا ەرەكشە العىستارىن ءبىلدىردى.
تاقىرىپقا وراي:
لۋگمار بۋلاروۆ، قازاقستان حالقى اسسامبلەياسى مەن ۇلتتىق قۇرىلتاي مۇشەسى.
"قازاقستان حالقى اسسامبلەياسى 1995 جىلى مەملەكەت باسشىسىنىڭ باستاماسىمەن قۇرىلعان بولاتىن. سودان بەرى بۇل ينستيتۋت ەلدەگى ەتنوسارالىق كەلىسىمدى نىعايتىپ، مادەني ارتۇرلىلىكتى ۇلتتىق بىرلىككە اينالدىرىپ كەلەدى. قازىرگى تاڭدا تەك المااتى قالاسىندا عانا ەمەس بۇكىل ەل بويىنشا اسسامبلەيانىڭ باستاماسىمەن ءتۇرلى ەتنو مادەني ءىس-شارالار، قايىرىمدىلىق اكسيالار مەن ءبىلىم بەرۋ جوبالارى جۇزەگە اسىرىلىپ جاتىر. ىستىق ىقىلاسقا تولى وسىناۋ شارانى ەلىمىزدىڭ بولاشاققا دەگەن سەنىمىنىڭ تاعى ءبىر جارقىن مىسالى دەسەم بولادى. وقۋشىلاردىڭ شىعارماشىلىق الەۋەتى، ۇستازداردىڭ مەيىرىمى مەن اتا-انالاردىڭ بەلسەندىلىگى — مۇنىڭ ءبارى قازاقستاننىڭ كوپۇلتتى، ءبىرتۇتاس ءارى مىقتى مەملەكەت ەكەنىن ايقىن كورسەتتى".