بۇل شاراعا حالىقارالىق بايقاۋلاردىڭ لاۋرەاتتارى قاتىستى.
الماتى قالاسىنداعى «الاتاۋ» ءداستۇرلى ونەر تەاترىندا اقپاراتتىق-ناسيحاتتاۋ توبىنىڭ جۇمىسى اياسىندا ۇلتتىق ۇلان ءان-بي ءانسامبلىنىڭ ارتىستەرى گالا-كونسەرت وتكىزدى، دەپ حابارلايدى Almaty-akshamy.kz Egemen.kz سىلتەمە جاساپ.
مەرەكەلىك كونسەرتتە حالىقارالىق بايقاۋلاردىڭ لاۋرەاتتارى مەن باسقا دا تالانتتار انسامبل باستىعى، اعا لەيتەنانت الپامىس اسىلبەكتىڭ جەتەكشىلىگىمەن قازاقستاندىق كومپوزيتورلاردىڭ پاتريوتتىق تاقىرىپتاعى اندەرىن، سوعىس جىلدارىنداعى كومپوزيسيالاردى، سونداي-اق حالىق شىعارمالارى مەن كۇيلەرىن ورىندادى.
اعا لەيتەنانت الپامىس اسىلبەكتىڭ باسشىلىعىمەن شىعارماشىلىق ۇجىمنىڭ مۋزىكانتتارى سوليستەرگە كاسىبي تۇردە سۇيەمەلدەدى.
كونسەرت كورەرمەندەرىنە ۇلتتىق ۇلان قۇرمەتتى قاراۋىل روتاسى جاۋىنگەرلەرىنىڭ وركەستردىڭ ورىنداۋىنداعى «اداي» ءانى مەن «قارۋ-جاراقپەن دەفيلە» كورسەتىلىمى ۇنادى.
سونداي-اق ۇلاندىقتاردىڭ «دومبىرا اڭىزى»، «پوبەدنايا پلياسكا»، «بوزايعىر» اتتى اسەرلى بيلەرى، پاتريوتتىق جانە ۇرپاقتار ساباقتاستىعى رۋحىنا تولى مايدان جانە اسكەري اندەر شىرقالدى.
ەلوردالىق بريگادانىڭ مەرزىمدى قىزمەت اسكەري قىزمەتشىلەرى ۇلتتىق ۇلان تۋرالى جازعان اۆتورلىق ءان كورەرمەندەردىڭ كوزايىمىنا اينالدى.
گالا-كونسەرت بارلىق قاتىسۋشىلار مەن انسامبل ۇجىمىنىڭ ورىنداۋىندا ۇلتتىق ۇلاننىڭ «ەلدىڭ قورعانى» ءانۇرانىن ورىنداۋ داستۇرىمەن اياقتالدى.
كونسەرت ۇيىمداستىرۋشىلارى تەاتر فويەسىندە ۇلتتىق ۇلان اسكەرىنىڭ قىزمەتىنە ارنالعان فوتو-بەينە جانە باسپا ونىمدەرىن دە كورسەتتى.
شارا سوڭىندا ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى، حالىق قاھارمانى، پولكوۆنيك قايرات ۇمبەتوۆ الماتى قالاسىنىڭ اكىمىنە ءوزارا ءىس-قيمىل جانە ۇلكەن كونسەرت زالىندا ونەر كورسەتۋ مۇمكىندىگى ءۇشىن العىس ايتىپ، «قۇقىق ءتارتىبى اسكەرلەرىنە 30 جىل» مەرەيتويلىق توسبەلگىسىن تابىس ەتتى.
شاھاردىڭ قوعامدىق دامۋ باسقارماسىنىڭ باستىعى ايدار ەسەنبەكوۆ الماتى قالاسى اكىمىنىڭ اتىنان اسكەري انسامبلگە العىسىن ءبىلدىرىپ، ەستەلىك سىيلىقتار مەن العىس حاتتاردى تابىس ەتتى.
