قازاقتا 150-دەن استام ۇلتتىق سپورت ءتۇرى بولعان
ۇلتتىق ويىندار – بابالارىمىزدان قالعان اسىل قازىنا. دانا حالقىمىز بالا تاربيەسىنە ۇلكەن ءمان بەرىپ، جاستايىنان سپورتقا باۋلىعان. عالىمداردىڭ زەرتتەۋىنشە، قازاقتا 150-دەن استام ۇلتتىق ويىن ءتۇرى بولعان، دەپ حابارلايدى Almaty-akshamy.kz Almaty.tv–گە سىلتەمە جاساپ.
الايدا كوبى ەل ەسىنەن شىعىپ، ۇمىتىلىپ كەتتى دەسەدى. سوعان قاراماستان وسى جولدا ايانباي ەڭبەك ەتىپ، ۇلتتىق سپورتتى بارىنشا دارىپتەپ جۇرگەن جاندار بارشىلىق.
بۇگىندە ۇلتتىق ويىندار بىرتىندەپ قايتا جاڭعىرىپ كەلەدى. ولاردىڭ قاتارىندا ءداستۇرلى ساداق اتۋ، اسىق ويناۋ جانە لاڭگى تەبۋ مەن ارقان تارتىس بار. قازىرگى كەيىپكەر دە اتالمىش سپورت تۇرلەرىن قولعا الىپ، قالاداعى اۋا رايىنىڭ قولايسىزدىعىنا قاراماستان الماتىلىقتارعا جابىق الاڭدا مەرەكەلىك كوڭىل-كۇي سىيلاۋدا.
قازاق حالقى ەجەلدەن ۇلتتىق ويىندارعا باي حالىق. ونىڭ باستاۋى تىم تەرەڭدە، عاسىرلار قويناۋىندا جاتىر. بۇگىندە ۇمىت بولعان ويىن تۇرلەرىن مەيرامبەك رۋسلانوۆ دارىپتەپ ءجۇر. ول 2 جىلدان بەرى وسى سالادا ەڭبەك ەتىپ كەلەدى.
«ءقازىر قازاقي ۇلتتىق كيىمدەر، ۇلتتىق سپورت تۇرلەرى جاقسى دامىپ جاتىر. سونى ءارى دامىتۋعا ازداپ ۇلەس قوسىپ جاتقان جايىمىز بار. بۇل – بالا كەزدەن بەرگى ءحوببيىم. ءوزىمىز اۋىلدان شىققاننان كەيىن ۇلتتىق ويىنداردى كوتەرۋ ماقساتىندا كوكپار دا ۇيىمداستىرىپ تۇرامىز»، – دەدى ۇيىمداستىرۋشى مەيرامبەك رۋسلانوۆ.
شارادا ۇلتتىق سپورتتىڭ بىرنەشە ءتۇرى ويناتىلدى. كوپشىلىك كوڭىلى ساداق اتۋ مەن اسىق ويناۋعا اۋدى. ۇيىمداستىرۋشىلار اۋەلى قاتىسۋشىلارعا ساداق تارتۋدىڭ قىر-سىرىن ۇيرەتتى. قازاق حالقى ەجەلدەن جاۋىنگەرلەردىڭ مەرگەندىك قابىلەتىن جەتىلدىرۋ ءۇشىن اتالمىش سپورتتان بولەك، جامبى اتۋدى ويلاپ تاۋىپ، جارىستار وتكىزگەن. ول ءبىر جاعىنان اسكەري دايىندىقتى نىعايتۋ بولسا، ەكىنشى جاعىنان ۇلتتىق رۋحتى وياتادى.
ساداق اتۋ – قازاقتىڭ قانىندا بار ۇلتتىق ويىنداردىڭ ءبىرى. بۇل سپورتتىق قۇرىلعى ادامدى مەرگەندىككە، توزىمدىلىككە جانە شىدامدىلىققا تاربيەلەپ، سىمباتتى دەنە ءبىتىمىن قالىپتاستىرادى.
«ۇلتتىق ويىنداردىڭ وتەتىنىن ەستىپ، الماتى ارنايى كەلدىم. وسىنداي ويىنداردى ءجيى-جيى وتكىزىپ تۇرسا دەيمىن. ۇلتتىق سپورتىمىزدى وسىلاي دارىپتەپ، ماداقتاپ، وركەندەتە بەرۋلەرىڭىزگە تىلەكتەسپىن»، – دەدى قالا قوناعى ەرجان يسا.
ۇيىمداستىرۋشىلاردىڭ ايتۋىنشا، سوڭعى ۋاقىتتا ۇلتتىق سپورتقا قىزىعاتىن قىزدار قاۋىمى ارتىپ كەلەدى. سولاردىڭ ءبىرى – ءنايليا سايلاۋبەك قىزى. ول بالا كەزىنەن ساق پاتشايىمى توميريس پەن ايگىلى قابانباي باتىردىڭ قىزى نازىمعا ەلىكتەپ، ات پەن ساداققا ماشىقتانىپ وسكەن.
«مەندە ساداق اتىپ، اتپەن شاپقان كەزدە كەرەمەت رۋح، كەرەمەت سەزىم پايدا بولادى. سول سەبەپتى وسى سپورتتىڭ تاڭدادىم. ءالى كۇنگە دەيىن اتپەن، ساداقپەن اينالىسىپ جاتىرمىن»، – دەدى سپورتشى ءنايليا سايلاۋبەك قىزى.
«ۇلتتىق ويىنداردىڭ دارىپتەلۋى بولاشاق ۇرپاققا قازاقتىڭ رۋحىن ءسىڭىرىپ وسۋىنە سەپتىگىن تيگىزەدى»، – دەدى قالا تۇرعىنى ايدانا اقىلتايەۆا.
شارا سوڭىندا ۇيىمداستىرۋشىلار الماتىلىقتاردى مەركەمەن قۇتتىقتاپ، ناۋرىز كوجەدەن ءدام تاتقىزدى.