جۇمىسشى ماماندىقتار جىلى اياسىندا الماتى قالاسى تۋريزم جانە قوناقجايلىلىق يندۋسترياسى كوللەدجى بازاسىندا I رەسپۋبليكالىق «ۇلتتىق ءدام» بايقاۋى ءوتتى.
بايقاۋ-فەستيۆالگە الەۋمەتتىك سەرىكتەستەر، الماتى قالاسى مەن الماتى جانە جامبىل وبلىستارىنىڭ كوللەدج ستۋدەنتتەرى، وندىرىستىك وقىتۋ شەبەرلەرى، وقىتۋشىلار قاتىستى. بايقاۋعا 60-قا جۋىق قاتىسۋشى جينالدى، ال «ءدامدى» ءىس-شارانى 50-دەن استام قوناق تاماشالادى.
تۋريزم جانە قوناقجايلىلىق يندۋسترياسى كوللەدجىنىڭ ديرەكتورى، بايقاۋ ۇيىمداستىرۋشىلارىنىڭ ءبىرى ن.جابىقبايەۆ ءىس-شارانىڭ ماڭىزدىلىعىن اتاپ ءوتتى.
«فەستيۆالدىڭ ماقساتى – اسپازدىق ونەر سالاسىنداعى جۇمىسشى ماماندىقتاردى ناسيحاتتاۋ، قازاق ۇلتتىق تاعام داستۇرلەرىن جاڭعىرتۋ مەن ساقتاۋ، سونداي-اق اسپاز ماماندىعىنىڭ بەدەلىن ارتتىرىپ، جاستاردىڭ شىعارماشىلىق الەۋەتىن دامىتۋ»، – دەدى ول.
ءيا، قازاقتىڭ ۇلتتىق اسحاناسىنىڭ عاسىرلار بويى قالىپتاسقان ءداستۇرىن ساقتاۋ جانە كەڭىنەن ناسيحاتتاۋ، ۇمىت قالعان تاعام تۇرلەرىن قايتا جاڭعىرتۋدا ماقسات ەتكەن فەستيۆالدە قاتىسۋشىلار «ءاسىپ»، «جانىشپا»، «مي شۇجىق»، «قۇيرىق باۋىر»، «جەنت»، «بالقايماق»، «ۋىز»، «قۇيماق» سىندى ۇمىت بولا باستاعان تاعامداردى جاڭاشا تۇردە ۇسىنۋعا تىرىستى. بايقاۋ سونىمەن قاتار قازاق تاعامىن تۋريستەر اراسىندا كەڭىنەن تانىتۋعا، ونى مەيرامحانا يندۋسترياسىندا ىلگەرىلەتۋگە جانە اسپازدىق ونەر سالاسىندا وزىق تاجىريبە الماسۋعا ىقپال ەتتى.
«ءبىز – وندىرىستىك وقىتۋ شەبەرلەرىنىڭ كومانداسى، جامبىل وبلىسىنان كەلدىك. دايىندىق بارىسىندا ۇلتتىق ءداستۇرىمىزدى زەرتتەپ، مەيرامحانا مازىرىنە ەنگىزۋگە بولاتىن، زاماناۋي ۇلگىدە دايىندالعان تاعامدار ازىرلەدىك. بۇل تاعامدار تەك وتانداستارىمىزعا عانا ەمەس، سونىمەن قاتار ەلىمىزدىڭ قوناقتارى مەن تۋريستەرىنە دە ۇنايدى دەپ ويلايمىز»، – دەيدى تاراز سەرۆيس جانە تەحنولوگيا كوللەدجىنىڭ وقىتۋشىسى م.قۇرمانالييەۆا.
«جاندانعان ۇلتتىق ءدام» نوميناسياسىنىڭ باس جۇلدەسىن الماتى قالاسى تۋريزم جانە قوناقجايلىلىق يندۋسترياسى كوللەدجى يەلەندى. 1-ورىن – الماتى تەحنولوگيالىق-قارجىلىق جانە يننوۆاسيالىق-تەحنولوگيالىق كوللەدجىنە، 2-ورىن – الماتى تەحنولوگيالىق كوللەدجى مەن تاراز (جامبىل وبلىسى) سەرۆيس جانە تەحنولوگيا كوللەدجىنە، ال 3-ورىن جامبىل كاسىپتىك كوللەدجى مەن قاسكەلەڭ كاسىپتىك-تەحنيكالىق كوللەدجىنە (الماتى وبلىسى) بۇيىردى.
بايقاۋ جەڭىمپازدارى ديپلومدارمەن جانە باعالى سىيلىقتارمەن ماراپاتتالدى.