الماتى اكىمدىگىنىڭ قولداۋىمەن Dota 2، CS2 جانە FC 25 بويىنشا رەسپۋبليكالىق تۋرنير ۇيىمداستىرىلادى
24 مامىر كۇنى الماتىداعى «FORUM» ساۋدا ويىن-ساۋىق ورتالىعىندا (سەيفۋللين داڭعىلى، 617) گەيمينگ، كيبەرسپورت جانە سيفرلىق مادەنيەت جانكۇيەرلەرىنە ارنالعان ءىس-شارا – Almaty Cyber Games Media & Cup 2025 وتەدى.
جوبا ءۇشىنشى رەت وتكىزىلىپ وتىر جانە قازاقستاننىڭ ورتالىق ازياداعى سيفرلىق سپورت ورتالىعى رەتىندەگى مارتەبەسىن نىعايتىپ كەلەدى.
ءىس-شارا اياسىندا ەلىمىزدىڭ تۇكپىر-تۇكپىرىنەن كەلگەن مىقتى ويىنشىلار مەن جانكۇيەرلەر باس قوساتىن رەسپۋبليكالىق تۋرنير وتەدى. بيىل Counter-Strike 2 ويىنى بويىنشا مەديالىق تۋرنيرگە باسا نازار اۋدارىلىپ وتىر. وندا تانىمال بلوگەرلەر، اكتەرلەر، ستريمەرلەر مەن مۋزىكانتتار ب ا ق سىنايدى.
قاتىسۋشىلار جۇلدە قورى ءۇشىن عانا ەمەس، سونىمەن قاتار، حالىقارالىق دەڭگەيدەگى ACG International تۋرنيرىنە جولداما الۋ ءۇشىن دە جارىسادى. تۋرنير Dota 2، Counter-Strike 2 جانە FC 25 سىندى ءۇش نەگىزگى ويىن بويىنشا وتەدى.
ACG جوباسىنىڭ باستى ماقساتىنىڭ ءبىرى ەلدەگى سيفرلىق ينفراقۇرىلىمدى دامىتۋ. كيبەرسپورت – سيفرلىق ترانسفورماسيانىڭ ماڭىزدى كورسەتكىشى عانا ەمەس، سونىمەن بىرگە IT مەن جاڭا تەحنولوگيالارعا ينۆەستيسيا سالۋعا تارتىمدى سالا.
الماتىلىقتار مەن قالا قوناقتارى 24 مامىر كۇنى ساعات 10:00-دەن 20:00-گە دەيىن سيفرلىق بولاشاقتىڭ اتموسفەراسىنا ەنىپ، زاماناۋي تەحنولوگيانىڭ مۇمكىندىكتەرىمەن تانىسا الادى.
ءىس-شارانى iPlay Esports جانە ۇلتتىق ستۋدەنتتىك كيبەرسپورت قاۋىمداستىعى (NESA) الماتى قالاسى اكىمدىگىنىڭ سيفرلاندىرۋ باسقارماسىنىڭ قولداۋىمەن ۇيىمداستىرىپ وتىر.