الماتىدا «نۇرلى تاۋ» شاعىناۋدانىندا ورنالاسقان جۇمىس ىستەمەي تۇرعان مونشا كەشەنى ورتەندى. وتقا ورانعان مونشا كەشەنىنىڭ ۆيدەوسى الەۋمەتتىك جەلىدە تارادى.
الماتى قالالىق توتەنشە جاعدايلار دەپارتامەنتى ءورت سوندىرۋشىلەر 2 قىركۇيەك كۇنى ساعات 23:13-تە جوعارى دابىل بەلگىسىمەن بوستاندىق اۋدانى «نۇرلى تاۋ» شاعىناۋدانى، نۇرتازين، 1 مەكەنجايىنا شىققانىن حابارلادى.
وقيعا ورنىنا جەتكەندە مونشا كەشەنىنىڭ 600 شارشى مەتر اۋماقتا سالىنىپ جاتقان ەكى قاباتتى عيماراتىنان وت شىققانى انىقتالدى. ورتەنگەن عيمارات قۇلاي باستاعان.
ءورتتىڭ تەز تارالۋىنا عيماراتتىڭ اعاشتان جاسالعانى سەبەپ بولدى. سونداي-اق ءورتتىڭ ەكى تۇرعىن ۇيگە تارالۋ ءقاۋپى تۋدى.
«وقيعا ورنىندا شتاب پەن سوندىرىلەتىن ەكى ۋچاسكە قۇرىلدى. ءورت ءسوندىرۋ جانە كورشىلەس ۇيلەردى ورتتەن قورعاۋ ءۇشىن وقپاندار ەنگىزىلدى. ءورت سوندىرۋشىلەر قاۋىپسىزدىك ەرەجەسىنە سايكەس جۇمىس ىستەدى. رەس-5 ەلەكتريكتەرى نىساندى توقتان اجىراتتى. ءورت بولعان جەر «سۋى از» اۋماق بولعان سوڭ ءتىلسىز جاۋمەن كۇرەس قيىنعا سوقتى. الايدا سۋ ۇزدىكسىز بەرىلدى. سونىمەن قاتار، «الماتى سۋ» مەكەمەسىنىڭ تەحنيكاسى جۇمىلدىرىلدى»، - دەپ حابارلادى الماتى قالالىق تجد.
جالىندى اۋىزدىقتاۋعا 66 ادام، 22 تەحنيكا جۇمىلدىرىلدى.
ءورت ساعات 00:27-دە وقشاۋلانىپ، 01:20-دا ءسوندىرىلدى. زارداپ شەككەندەر مەن قازا تاپقاندار بولعان جوق.
مونشا كەشەنىنىڭ ايتارلىقتاي بولىگى ورتتەن امان قالدى.
پوليسيا قىزمەتكەرلەرى ءورت بولعان جەردى قورشاۋعا الىپ، قوعامدىق ءتارتىپتى قامتاماسىز ەتتى.