سايران كولىندە 11 ادام قۇتقارىلدى
الماتىدا شومىلۋ ماۋسىمى باستالعالى تىيىم سالىنعان ورىنداردا 4 ادام سۋعا باتىپ كەتتى، دەپ حابارلايدى Almaty-akshamy.kz.
الماتى قالاسى توتەنشە جاعدايلار دەپارتامەنتىنىڭ مالىمەتىنشە، ماۋسىم ايىندا قالانىڭ رۇقسات ەتىلمەگەن جەرلەرىندە شومىلعانى ءۇشىن 15 ادام اكىمشىلىك جاۋاپكەرشىلىككە تارتىلدى.
الكوگولدى ىشىمدىكتەر ىشكەنى نەمەسە ماس كۇيىندە قوعامدىق ورىنعا شىققانى ءۇشىن 38 ادامعا، جالپى سوماسى 291 مىڭ تەڭگەگە ايىپپۇل سالىندى.
سايران سۋ قويماسىندا اكىمشىلىك قۇقىق بۇزۋشىلىق تۋرالى كودەكستىڭ 412-بابى («سۋ ايدىندارىنداعى قاۋىپسىزدىك ەرەجەلەرىن بۇزۋ نەمەسە ورىنداماۋ») بويىنشا تجد قىزمەتكەرلەرى اكىمشىلىك حاتتاما تولتىرىپ، 3 ادامعا ايىپپۇل سالدى.
«الماتىدا شومىلۋ ماۋسىمى باستالعاننان بەرى سايران كولىندە 11 ادام قۇتقارىلدى، ونىڭ ىشىندە 2 بالا بار (2021 جىلى 11 ادام، ونىڭ ىشىندە 4 بالا قۇتقارىلعان بولاتىن). ەسكە سالساق، 2021 جىلى جاز مەزگىلىندە سۋ ايدىندارىندا شومىلۋعا تىيىم سالىنعان ورىنداردا 4 ادام، ونىڭ ىشىندە ءبىر ءجاسوسپىرىم سۋعا باتىپ كەتكەن بولاتىن»،- دەلىنەدى تجد حابارلاماسىندا.
وسى ورايدا قالالىق توتەنشە جاعدايلار دەپارتامەنتى قالا تۇرعىندارى مەن قوناقتارىن سۋعا ءتۇسۋ ەرەجەلەرىن بۇزباۋعا، رۇقسات ەتىلگەن جاعاجايلاردا عانا شومىلۋعا شاقىردى.
ايتا كەتەيىك، قازىرگى ۋاقىتتا قالالىق توتەنشە جاعدايلار دەپارتامەنتى، رەسپۋبليكالىق جەدەل قۇتقارۋ جاساعىنىڭ قىزمەتكەرلەرى جەرگىلىكتى پوليسيا قىزمەتى، ۇلتتىق ۇلان جانە ەرىكتىلەرمەن بىرلەسىپ، سۋ ايدىندارىندا پاترۋلدەۋ جانە رەيدتىك ءىس-شارالار جۇرگىزۋدە.