الماتىدا تۇرمىستىق زورلىق-زومبىلىق قىلمىستارىن تەرگەيتىن تەرگەۋشىلەرگە ارنالعان سەمينار ءوتتى، دەپ حابارلايدى aqshamnews.kz Polisia.kz-كە سىلتەمە جاساپ.
سەميناردىڭ سپيكەرى – الماتى قالالىق ادۆوكاتتار القاسىنىڭ ادۆوكاتى، ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى ايمان ۋماروۆا. وقىتۋ جيىنىندا ايەلدەر مەن كامەلەتكە تولماعانداردىڭ جىنىستىق قول سۇعىلماۋشىلىقتارىنا قارسى قۇقىق بۇزۋشىلىقپەن كۇرەسۋ شارالارى، سونداي-اق سوتقا دەيىنگى تەرگەۋ ساپاسىن ارتتىرۋ تەتىكتەرى تالقىلاندى.
– وزدەرىڭىز بىلەتىندەي، قازاقستاندا مەملەكەت باسشىسىنىڭ تاپسىرماسى بويىنشا وسى ساناتتاعى قىلمىستار ءۇشىن جاۋاپكەرشىلىكتى كۇشەيتۋ بويىنشا شارالار قابىلدانعان. سونىمەن قاتار بۇگىندە رەسپۋبليكادا جۇمىس ىستەيتىن داعدارىس ورتالىقتارىندا پيلوتتىق رەجيمدە جىنىستىق زورلىق-زومبىلىق قۇرباندارىنا جان-جاقتى (مەديسينالىق، پسيحولوگيالىق، الەۋمەتتىك، قۇقىقتىق) كومەك كورسەتىلىپ جاتقانىن بۇعان دەيىن حابارلاعان بولاتىنبىز. ولاردا زورلىق-زومبىلىق قۇرباندارى ءۇشىن قاجەتتى قولايلىلىق پەن جايلىلىق جاسالدى، جابىرلەنۋشىلەرمەن پسيحولوگتاردىڭ جۇمىسى ۇيىمداستىرىلدى، ايەل-تەرگەۋشىلەرگە تەرگەۋ ارەكەتتەرىن جۇرگىزۋگە مۇمكىندىك جاسالدى. جالپى بۇل جوبانىڭ جۇزەگە اسۋى قۇقىق قورعاۋشىلاردان، ازاماتتىق قوعام وكىلدەرىنەن، جەرگىلىكتى اتقارۋشى جانە قۇقىق قورعاۋ ورگاندارىنان وڭ باعاسىن الدى، – دەدى، الماتى قالالىق پوليسيا دەپارتامەنتى باستىعىنىڭ ورىنباسارى رۋستام شارىبايەۆ.
سونىمەن قاتار سپيكەر، ەلىمىزدىڭ بارلىق پوليسيا دەپارتامەنتتەرىندە تۇراقتى تەرگەۋ-جەدەل توپتارى قۇرىلعانىن، ولاردىڭ قۇرامىنا ايەل تەرگەۋشىلەر، سونداي-اق ايەلدەردى زورلىق-زومبىلىقتان قورعاۋ جانە يۋۆەنالدى پوليسيا، جەدەل كريميناليستيكالىق جانە كريمينالدىق پوليسيا بولىمشەلەرىنىڭ قىزمەتكەرلەرى كىرگەنىن ەسكە سالدى.