الماتى قالاسىندا ءبىر جىلدىق تۇرىك ءتىلى كۋرسىنىڭ سالتاناتتى جابىلۋ كەشى ءوتتى.
شارا بارىسىندا كۋرس قاتىسۋشىلارى – ستۋدەنتتەر مەن وقىتۋشىلارعا ارنايى سەرتيفيكاتتار تابىستالىپ، ۇزدىكتەرگە تۇركيا رەسپۋبليكاسىندا ەكى اپتالىق ءبىلىم باعدارلاماسىنا جولداما بەرىلدى، دەپ حابارلايدى aqshamnews.kz.
كەشكە تۇركيا رەسپۋبليكاسىنىڭ الماتىداعى باس كونسۋلدىعىنىڭ وكىلى ايحان كوركماز، الماتى مەملەكەتتىك بيزنەس كوللەدجىنىڭ ديرەكتورى اينۇر قۋانىش قىزى جانە وقۋ ۇدەرىسىنە بەلسەندى قاتىسقان وقىتۋشىلار مەن ستۋدەنتتەر قاتىستى.
مەملەكەت باسشىسى قاسىم-جومارت توقايەۆتىڭ: «باسەكەگە قابىلەتتى بولۋدىڭ بىردەن-بىر جولى – كوپ ءتىل ءبىلۋ. اسىرەسە، شەت تىلدەرىن مەڭگەرۋ – جاڭا مۇمكىندىكتەرگە جول اشادى» دەگەن ءسوزى بۇل كەشتىڭ ءمانى مەن مازمۇنىن اشىپ تۇرعانداي. تۇرىك تىلىنە دەگەن قىزىعۋشىلىقتىڭ ارتۋى – قازاقستان مەن تۇركيا اراسىنداعى مادەني جانە ءبىلىم بايلانىسىنىڭ ايقىن كورىنىسى.
شارا بارىسىندا ءسوز العان الماتى مەملەكەتتىك بيزنەس كوللەدجىنىڭ ديرەكتورى اينۇر قۋانىش قىزى:
«بۇگىن – ءبىر جىلدىق ەڭبەكتىڭ قورىتىندىسى. بۇل كۋرس ستۋدەنتتەرىمىزگە تەك ءتىل ۇيرەتىپ قانا قويماي، تۇركيا مادەنيەتىمەن ەتەنە تانىسۋعا مۇمكىندىك بەردى. مۇنداي جوبالار الداعى ۋاقىتتا دا جالعاسىن تابادى دەپ سەنەمىز. ۇستازدارىمىزعا، قولداۋ بىلدىرگەن تاراپتارعا العىسىم شەكسىز»، – دەدى.
كەشتىڭ قۇرمەتتى قوناعى، تۇركيا رەسپۋبليكاسىنىڭ الماتىداعى باس كونسۋلدىعىنىڭ وكىلى ايحان كوركماز مىرزا:
«قازاقستان مەن تۇركيا اراسىنداعى دوستىق – تەرەڭ تاريحي نەگىزگە يە. وسىنداي باستامالار بۇل بايلانىستى ودان ءارى نىعايتا تۇسەدى. تۇرىك ءتىلىن ۇيرەنىپ جاتقان جاستار – ءبىزدىڭ بولاشاق مادەني ەلشىلەرىمىز»، – دەپ اتاپ ءوتتى.
سالتاناتتى كەش بارىسىندا ءوز كاسىبيلىگىمەن كوزگە تۇسكەن وقىتۋشى مۇحاممەد اشچىعا ارنايى العىس ءبىلدىرىلىپ، ۇزدىك جەتى ستۋدەنت پەن ءۇش مۇعالىمگە تۇركيا مەملەكەتىندە ەكى اپتالىق تەگىن ءبىلىم باعدارلاماسىنا جولداما بەرىلدى.
جولداما العان ۇستازداردىڭ ءبىرى – كوللەدج وقىتۋشىسى شولپان مارات قىزى بۇل مۇمكىندىكتى زور قۋانىشپەن قابىلداعانىن جەتكىزدى:
«تۇركياعا بارىپ، ءبىلىمىمىزدى تەرەڭدەتۋگە مۇمكىندىك العانىمىز – ۇلكەن مارتەبە. بۇل تەك كاسىبي دامۋ عانا ەمەس، ەكى ەل اراسىنداعى دوستىقتى تەرەڭ تۇسىنۋگە جول اشادى. ءوزىم دە وسى كۋرس ارقىلى تۇرىك تىلىنە دەگەن قىزىعۋشىلىعىمدى ارتتىردىم. بولاشاقتا بۇل ءتىلدى وقىتۋمەن دە اينالىسقىم كەلەدى»، – دەدى ۇستاز ءوز پىكىرىندە.
سونداي-اق، جولداما العان ستۋدەنتتەردىڭ ءبىرى – كوللەدجدىڭ ۇزدىك ءبىلىم الۋشىلارىنىڭ قاتارىنداعى تولەگەن نۇراسىل:
«ءبىر جىل ىشىندە تەك ءتىل ۇيرەنىپ قانا قويماي، جاڭا دوستار تاۋىپ، شەت ەل مادەنيەتىن تانۋعا مۇمكىندىك الدىق. تۇركياعا ساپار – مەن ءۇشىن ۇلكەن ارمان ەدى. بۇل مۇمكىندىك ءۇشىن بارلىق ۇستازدارعا العىسىم شەكسىز»، – دەپ اسەرىمەن ءبولىستى.
ايتا كەتەيىك، بۇل تۇرىك ءتىلى كۋرسى 5 جىلعا جالعاساتىن جوبا رەتىندە جوسپارلانىپ وتىر. جىل سايىن جاڭا توپتار قابىلدانىپ، ۇزدىكتەرگە تۇركيادا ءبىلىمىن جالعاستىرۋ مۇمكىندىگى بەرىلمەك.
سالتاناتتى كەش جىلى جۇزدەسۋلەرمەن، شىعارماشىلىق قويىلىمدارمەن جانە شىنايى العىس سوزدەرىمەن جالعاستى. كۋرس تۇلەكتەرى بولاشاقتا تۇرىك ءتىلىن كاسىبي دەڭگەيدە مەڭگەرىپ، ءبىلىم مەن مادەنيەت كوپىرىن جالعايتىن ماماندار قاتارىنا قوسىلۋعا نيەتتى.