پرەزيدەنت مەديسينا سالاسىنىڭ قىزمەتكەرلەرىن اقورداعا شاقىرىپ، كاسىبي مەرەكەلەرىمەن قۇتتىقتادى، دەپ حابارلايدى aqshamnews.kz.
"الەمنىڭ «ەكىنشى ۇستازى» – ءال-فارابي مەديسينانى ونەر دەپ باعالاعان. راسىندا، دارىگەر بولۋ – جۇرەكتىڭ ءىسى"، - دەدى مەملەكەت باسشىسى.
بۇگىندە ەلىمىزدىڭ دەنساۋلىق ساقتاۋ سالاسىندا 380 مىڭعا جۋىق ادام جۇمىس ىستەيدى. پرەزيدەنت ءار ماماننىڭ ەڭبەگى وراسان زور ەكەنىن اتاپ ءوتتى.
"ەلىمىزدە ورتاشا ءومىر ءسۇرۋ ۇزاقتىعى 75،4 جاسقا جەتتى. انا مەن بالا ءولىمى شامامەن 12 پايىزعا ازايدى.
بەس جىلدا 800-گە جۋىق دەنساۋلىق ساقتاۋ نىسانى، ياعني، كوپتەگەن ەمحانا مەن اۋرۋحانا سالىندى
ەلىمىزدە اۋىلدىق جەردەگى مەديسينا جۇيەسىن جاڭعىرتۋعا ارنالعان ۇلتتىق جوبا جۇزەگە اسىرىلىپ جاتىر. بۇگىندە 469 عيمارات بوي كوتەردى. جىل سوڭىنا دەيىن تاعى 186 نىسان سالىنادى
جىل سايىن 45 مەملەكەتتەن شامامەن 10 مىڭ ادام قازاقستانعا ەمدەلۋ ءۇشىن ارنايى كەلەدى. بۇل ەلىمىزدەگى دارىگەرلىك كومەكتىڭ ساپاسى جوعارى ەكەنىن كورسەتەدى
ەلىمىزدە ورگانداردى ترانسپلانتاسيالاۋ ءىسى جوسپارلى تۇردە دامىپ كەلەدى. جۋىردا جۇرەك اۋىستىرۋعا ارنالعان ءجۇزىنشى وتا ءساتتى ءوتتى
وزدەرىنە سايكەس كەلەتىن ورگانداردى الۋ ءۇشىن پاسيەنتتەر بىر-بىرىنە دونور بولدى. مۇنداي كۇردەلى وپەراسيالار دۇنيە جۇزىندە التى ەلدە عانا جاسالادى
بىلتىردان بەرى ەلىمىزدە مۇلدە جاڭا باعىت – فەتالدى مەديسينا دامي باستادى. ياعني، بۇل – انا قۇرساعىنداعى شاراناعا وپەراسيا جاساۋ دەگەن ءسوز
عالىمدارىمىز ونكولوگيا، ترانسپلانتولوگيا، نەوناتولوگيا، گەنەتيكا، بيومەديسينا سالالارىندا تىڭ جاڭالىقتار اشتى
جاساندى ينتەللەكت سىرقاتتاردى انىقتاۋ مەن ەمدەۋدىڭ كوكجيەگىن كەڭەيتەدى. اتالعان پەرسپەكتيۆتى سالادا ايتارلىقتاي سەرپىلىس جاساۋ قاجەت"، - دەدى پرەزيدەنت قاسىم-جومارت توقايەۆ.
بىلتىردان باستاپ پرەزيەدنتتىڭ تاپسىرماسىمەن «قازاقستاننىڭ ەڭبەك سىڭىرگەن دارىگەرى» اتاعى بەرىلە باستادى. قاسىم-جومارت توقايەۆ بۇل – مەديسينا قىزمەتكەرلەرىنە دەگەن ايرىقشا قۇرمەتتىڭ بەلگىسى ەكەنىن ايتتى.
سوڭعى 5 جىلدا دەنساۋلىق ساقتاۋ سالاسىنداعى جالاقى ەكى ەسەگە جۋىق ءوستى. مەديسينا كادرلارىن دايارلايتىن جوو مەن كوللەدجدەردىڭ شاكىرتاقىسى كوبەيدى.
دەنساۋلىق ساقتاۋ ىسىنە بولىنەتىن قارجى جىل وتكەن سايىن ارتىپ كەلە جاتىر. بيىل ونىڭ كولەمى 2،6 تريلليون تەڭگەگە جەتتى
مەديسينا قىزمەتكەرىنىڭ قاۋىپسىزدىگىنە قاتەر توندىرەتىن زاڭسىز ارەكەتكە جول بەرۋگە بولمايدى. قوعامدىق ءتارتىپتى بۇزاتىن وسىنداي ادامدار مىندەتتى تۇردە زاڭ اياسىندا جاۋاپكەرشىلىككە تارتىلادى.