وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ الماتى قالاسى بويىنشا دەپارتامەنتىنىڭ تابيعي مونوپوليالار مەن باعالاردى رەتتەۋ ءبولىمىنىڭ باسشىسى ارداق جاڭابايەۆا «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنىڭ ىسكە اسىرىلۋى تۋرالى ايتىپ بەردى.
ونىڭ اقپاراتى بويىنشا، 2025 جىلعا الماتى قالاسىنا 43 672،1 ملن تەڭگە كولەمىندە ينۆەستيسيا قاراستىرىلعان. قاراجات قالانىڭ ينجەنەرلىك ينفراقۇرىلىمىن جاقسارتۋعا باعىتتالادى: 24 065 ملن تەڭگە – ەلەكترمەن جابدىقتاۋ جەلىلەرىنىڭ 114 شاقىرىمىن جاڭعىرتۋ مەن سالۋعا جانە 29 بىرلىك جابدىق ساتىپ الۋعا، 19 607،1 ملن تەڭگە – سۋ قۇبىرى جەلىلەرىنىڭ 55،9 شاقىرىمىن جاڭعىرتۋ مەن سالۋعا جۇمسالادى.
«بۇگىندە شجق «الماتى سۋ» مكك مەن «الاتاۋ جارىق كومپانياسى» اق جوبانى ىسكە اسىرۋعا دايىن. ءبىز جەرگىلىكتى اتقارۋشى ورگاندارمەن بىرلەسە وتىرىپ، باسىم باعىتتاردى ايقىنداپ، جوبالىق-سمەتالىق قۇجاتتامانى ازىرلەۋ جانە ساراپتامادان وتكىزۋ جۇمىستارىن جۇرگىزىپ جاتىرمىز»، – دەپ حابارلادى ارداق جاڭابايەۆا.
ونىڭ ايتۋىنشا، قارجىلاندىرۋ تىكەلەي نەسيەلەۋ، وبليگاسيالار شىعارۋ جانە بيۋدجەتتىك نەسيەلەۋدى قوسا العاندا، ءارتۇرلى تەتىكتەر ارقىلى جۇزەگە اسىرىلادى.
«بۇل شارا از قامتىلعان ازاماتتارعا ولاردىڭ ناقتى قاجەتتىلىكتەرىن ەسكەرە وتىرىپ، كومەك كورسەتۋگە مۇمكىندىك بەرەدى، بۇل مەملەكەتتىك قولداۋ قاراجاتىن ءتيىمدى بولۋگە ىقپال ەتەدى»، - دەپ تولىقتىردى سپيكەر.