الماتىدا تۇنگى ۋاقىتتا جاسوسپىرىمدەر سايران سالعان ءدامحانا قىزمەتى توقتاتىلدى

بۇل مەكەمە المالى اۋداندىق پوليسيا باسقارماسى يۋۆەنالدى پوليسيا بولىمشەسىنىڭ نازارىنا بىرنەشە رەت ىلىككەن.

كوپتەگەن رەيدتەر مەن ءىس-شارالار ءدامحانا اكىمشىلىگىنىڭ كامەلەتكە تولماعان بالالاردىڭ تۇنگى ۋاقىتتا ەرەسەكتەرسىز جۇرۋىنە زاڭمەن تىيىم سالىنعانىن ەلەمەيتىنىن كورسەتەدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

ءدامحانا باسشىلىعىنا قاتىستى سوڭعى تەكسەرۋ ناتيجەلەرى بويىنشا ق ر اقبك-نىڭ 132-بابى 2-بولىگىنە سايكەس ماتەريال جيناقتالىپ، الماتى قالاسى بويىنشا مامانداندىرىلعان اۋدانارالىق اكىمشىلىك سوتىنا جولداندى، ونىڭ شەشىمىمەن اتالعان مەكەمەنىڭ قىزمەتى 30 كۇنتىزبەلىك كۇنگە توقتاتىلدى.

«قۇرمەتتى اۋدانىمىزدىڭ ويىن-ساۋىق مەكەمەلەرىنىڭ باسشىلارى! كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ ماقساتىندا قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ تالاپتارىن قاتاڭ ساقتاۋدى ەستەرىڭىزگە سالامىز. بالالار – ءبىزدىڭ بولاشاعىمىز. ەرتە الدىن الۋ – ەرەسەكتەر ءۇشىن ەڭ ماڭىزدى مىندەت. وسكەلەڭ ۇرپاق – ەلدىڭ تىرەگى»، – دەدى، المالى اۋداندىق پوليسيا باسقارماسىنىڭ باستىعى ەسەن ىسقاقوۆ.