الماتى قالاسىنىڭ تۋبەركۋلەزگە قارسى قىزمەتىنىڭ 2025 جىلى 12 ايداعى جۇمىسىنىڭ قورىتىندىسى بويىنشا بارلىق نەگىزگى كورسەتكىشى ورىندالدى. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ شتاتتان تىس باس فتيزياترى جانار ساپييەۆا قدسب باسشىسى مارات پاشيموۆتىڭ جانە قالانىڭ مەديسينالىق ۇيىمدارى وكىلدەرىنىڭ قاتىسقان كەزەكتى جۇمىس كەڭەسىندە مالىمدەدى.
الماتىدا تۋبەركۋلەزبەن اۋرۋشاڭدىق پەن ودان بولاتىن ءولىم-جىتىمدى تومەندەتۋ بويىنشا تۇراقتى وڭ ديناميكا تىركەلدى. اۋرۋشاڭدىق 15،9%-عا تومەندەپ، 100 مىڭ تۇرعىنعا شاققاندا 18،0 جاعداي بولدى، ال 2024 جىلدىڭ وسى كەزەڭىندە بۇل كورسەتكىش 21،5 بولعان.
بالالار اراسىندا دا وڭ وزگەرىستەر بايقالادى.
بالالارداعى تۋبەركۋلەزبەن اۋرۋشاڭدىق 2،2%-عا تومەندەپ، 100 مىڭ بالاعا شاققاندا 4،4 كورسەتكىش بولدى
تۋبەركۋلەزدى ەمدەۋدىڭ تيىمدىلىگى جوعارى دەڭگەيدە ساقتالىپ وتىر، بۇل كورسەتىلەتىن مەديسينالىق كومەكتىڭ ساپاسىن جانە پاسيەنتتەردىڭ ەمگە دەگەن جوعارى بەيىلدىلىگىن ايعاقتايدى.
ەمگە بەيىلدىلىكتى ارتتىرۋ ماقساتىندا امبۋلاتوريالىق كەزەڭدە پاسيەنتتەرگە جەرگىلىكتى بيۋدجەت قاراجاتى ەسەبىنەن اي سايىن 12 ايلىق ەسەپتىك كورسەتكىش (اەك) مولشەرىندە الەۋمەتتىك قولداۋ كورسەتىلەدى. سونىمەن قاتار، قالادا جىل سايىن «تۋبەركۋلەز» گرانتى بويىنشا مەملەكەتتىك الەۋمەتتىك تاپسىرىس ىسكە اسىرىلىپ، ونىڭ اياسىندا ۇكىمەتتىك ەمەس ۇيىمدار الەۋمەتتىك وسال توپتاعى ادامدارعا كومەك كورسەتەدى.
تۇراقتى ناتيجەگە قول جەتكىزۋدە الماتى قالاسى قدسب-نىڭ فتيزيوپۋلمونولوگيا ورتالىعىنىڭ مونيتورينگ جانە باعالاۋ ءبولىمى ماڭىزدى ءرول اتقارادى. 2025 جىلى 155 مونيتورينگ جانە 42 قاشىقتان مونيتورينگ جۇرگىزىلدى.
سونىمەن قاتار، مەديسينالىق مامانداردىڭ بىلىكتىلىگىن ارتتىرۋ باعىتىندا جۇيەلى جۇمىس جۇرگىزىلىپ كەلەدى. 2025 جىلى 12 ايدا قالانىڭ مەديسينالىق ۇيىمدارىندا جۇمىس ىستەيتىن 835 مەديسينا قىزمەتكەرى، ونىڭ ىشىندە دارىگەرلەر مەن ورتا بۋىن مەديسينا قىزمەتكەرلەرى وقىتۋدان ءوتتى.
كەشەندى ءتاسىل، كۇشەيتىلگەن باقىلاۋ جانە پاسيەنتتەرگە كورسەتىلەتىن الەۋمەتتىك قولداۋ الماتى قالاسىنا تۋبەركۋلەزبەن كۇرەستە ماڭىزدى ناتيجەلەرگە قول جەتكىزۋگە جانە نەگىزگى ەپيدەميولوگيالىق كورسەتكىشتەردىڭ تۇراقتى تومەندەۋىن جالعاستىرۋعا مۇمكىندىك بەردى.
سونداي-اق، كەزدەسۋ بارىسىندا اكۋشەرلىك-گينەكولوگيالىق جانە پەدياتريالىق كومەكتىڭ ساپاسىن مونيتورينگتەۋ جانە باعالاۋ ناتيجەسى، سونىمەن بىرگە الماتى قالاسىنىڭ بمسك جاستار دەنساۋلىق ورتالىقتارىنىڭ قىزمەتى تۋرالى ەسەپ تىڭدالدى.
قاتىسۋشىلار ساقتاندىرىلماعان ازاماتتار مەن نوزولوگيالار بويىنشا مەديسينالىق ۇيىمدار كەسكىنىندەگى جاعدايدى تالداۋعا ەرەكشە نازار اۋداردى.
بۇدان بولەك، الماتى قالاسىنداعى مەملەكەتتىك ەمحانالاردىڭ call-ورتالىقتارىنىڭ جۇمىسى، ونىڭ ىشىندە قوڭىراۋ شالۋ قولجەتىمدىلىگى، كەڭەس بەرۋ ساپاسى جانە تۇرعىنداردىڭ وتىنىشىنە جەدەل جاۋاپ بەرۋ جايى قارالدى.