الماتىنىڭ يندۋستريالدى ايماعىندا تروتۋار پليتالارى مەن بەتون جيەكتەرىن شىعاراتىن زاۋىتقا اۋقىمدى جاڭعىرتۋ جۇرگىزىلدى. ينۆەستيسيالاردىڭ جالپى سوماسى 1،2 ملرد تەڭگە بولدى، ونىڭ 25%-ى ينۆەستور ەسەبىنەن قارجىلاندىرىلدى ("سك راحات" ج ش س)، ال قالعان 75%-ى "دامۋ" قورىنىڭ سۋبسيديالاۋ باعدارلاماسى اياسىندا قارىز كاپيتالىمەن قامتاماسىز ەتىلدى. بۇل تۋرالى الماتى قالاسىنىڭ كاسىپكەرلىك جانە ينۆەستيسيالار باسقارماسى حابارلادى.
جوبا اياسىندا الەمدەگى جەتەكشى وندىرۋشىلەردىڭ زاماناۋي جابدىقتارى ساتىپ الىندى؛ ولار-ۇساق بولشەكتى بەتون بۇيىمداردى شىعارۋعا ارنالعان HESS Group (گەرمانيا) جەلىسى، ونىمدەردىڭ توزىمدىلىگىن ارتتىراتىن ROTHO-Stabil (گەرمانيا) كامەراسى، ءونىمدى تىكەلەي بايلايتىن VR-80 ماشيناسى جانە اۆتوماتتى ورايتىن RA100 (يتاليا) ماشيناسى، سونداي-اق پوليمەرمەن قاپتالعان تەحنولوگيالىق پوددوندار (پولشا).
ايتا كەتەيىك، العاشقى Hess Maschinenbrik GmbH وندىرىستىك جەلىسى 2023 جىلدىڭ مامىرىندا ىسكە قوسىلدى. 2024 جىلدىڭ سوڭىنا قاراي زاۋىت 153 مىڭ شارشى مەتر تروتۋار پليتالارىن ءوندىردى، ورتاشا ايلىق كولەمى 9 مىڭ شارشى مەتر، بۇل جوبالىق قۋاتتىڭ 36 پايىزى.
جۇرگىزىلگەن جاڭعىرتۋ جۇمىستارىنان كەيىن ءبىر اۋىسىممەن جۇمىس ىستەگەن جاعدايدا ءونىم شىعارۋ كولەمى ايىنا 25 مىڭ شارشى مەترگە دەيىن ۇلعايادى. ەكى اۋىسىمدىق رەجيمگە كوشكەن جاعدايدا، ءونىم كولەمى تىپتەن كوبەيەدى. ءوندىرىس پروسەسىن تولىق اۆتوماتتاندىرۋ ءونىمنىڭ ساپاسىن جاقسارتادى، اۋقىمدى ۇنەمدەۋ ارقىلى وزىندىك قۇندى تومەندەتەدى، شيكىزاتقا، ماتەريالدارعا جۇمسالاتىن شىعىندى ازايتىپ، جۇمىس كۇشىن وڭتايلاندىرادى.
كاسىپورىننىڭ جوبالىق قۋاتى – جىلىنا 180 تەكشە مەتر اۆتوكلاۆتى گازدى بەتون جانە 750 مىڭ شارشى مەتر تەمىر بەتون شىعارۋعا جەتەدى. بارلىق ونىمدەر قولدانىستاعى مەملەكەتتىك ستاندارتقا سايكەس شىعارىلادى جانە نەگىزىنەن جەرگىلىكتى شيكىزاتتان وندىرىلەدى. بۇرىن زاۋىتتىڭ تولىق اۆتوماتتاندىرىلماۋى ءونىم شىعارۋعا كەدەرگى بولعان. ياعني، ءونىمدى ەكسپوزيسيالاۋ، جيناۋ جانە قويمادا ساقتاۋدى قوسا العاندا، وندىرىستىك وپەراسيالاردىڭ ءبىر بولىگى قولمەن ورىندالاتىن. ەندى بارلىق پروسەستەر تولىعىمەن اۆتوماتتاندىرىلدى، بۇل كاسىپورىننىڭ ءونىم شىعارۋ دەڭگەيى ەداۋىر ارتتىرادى.