باستاماشىل توپ وكىلدەرىنىڭ باسپا ءسوز ءماسليحاتى ءوتتى.
بۇگىن الماتى قالاسىندا «توقايەۆتىڭ رەفورمالارى ءۇشىن» جاڭا قوزعالىسىنىڭ باسپا ءسوز كونفەرەنسياسى ءوتتى، دەپ حابارلايدى Almaty-akshamy.kz Egemen.kz سىلتەمە جاساپ.
قوعامدىق قوزعالىستى قۇرۋ جونىندەگى باستاماسى بەلگىلى قوعام جانە ساياسي قايراتكەرلەر، عىلىمي جانە شىعارماشىلىق زيالى قاۋىم مەن بيزنەس-قوعامداستىق وكىلدەرى، مادەنيەت جانە سپورت قايراتكەرلەرى، سونداي-اق قوعامدىق ۇيىمداردىڭ كوشباسشىلارى كوتەردى. ولاردىڭ قاتارىندا مەرەكە قۇلكەنوۆ، رايىمبەك باتالوۆ، اقبەرەن ەلگەزەك، سەرگەي پونوماريەۆ، بەكنۇر قيسىقوۆ، داۋرەن قۋات، داۋلەتكەرەي كاپ ۇلى، ءادىل احمەتوۆ، نازگۇل قارابالينا، مارات شيبۇتوۆ جانە تاعى باسقالار بار.
بىرلەستىك قۇرۋدىڭ باستى يدەياسى مەملەكەت باسشىسىنىڭ رەفورمالارىن قوعامدىق قولداۋ مەن ولاردى ىسكە اسىرۋعا قاجەتتى جاعداي جاساۋ.
«جالپى، 2019 جىلى باستالعان پرەزيدەنت رەفورمالارى كەزەڭ-كەزەڭىمەن جۇزەگە اسىپ كەلەدى. قايعىلى قاڭتار وقيعاسىنان كەيىن قوعامدى دەموكراتيالاندىرۋ مەن ليبەرالداندىرۋ پروسەسستەرى قارقىندى جۇرۋدە. سوندىقتان ءبىز ازاماتتىق قوعام وسى وزگەرىستەردىڭ بەل ورتاسىنا تابىلۋى قاجەت دەپ سانايمىز. ءبىزدىڭ قوزعالىس ۇگىت-ناسيحات ءۇشىن ەمەس، پروسەستەرگە قاتىسۋ ءۇشىن قۇرىلعان. ءبىز ءقازىر رەفورمالاردى قولداپ، وسى ماڭىزدى كەزەڭدى سوڭىنا دەيىن جەتكىزۋىمىز كەرەك»،- دەپ اتاپ ءوتتى قازاقستان جازۋشىلار وداعى ءتوراعاسىنىڭ ءبىرىنشى ورىنباسارى، اقىن اقبەرەن ەلگەزەك.
قوزعالىستى قۇرۋشىلار پارتيالىق دودا الاڭىن ليبەرالداندىرىپ، مەملەكەتتىك اپپاراتتىڭ كادرلىق قۇرامىن جەتىلدىرۋگە، ت.ب. باعىتتالعان ساياسي جاڭعىرۋ – دەموكراتيالىق پروسەستەردى جانداندىرىپ، ازاماتتىق قوعامدى دۇرىس باعىتتا ساياسيلاندىردى دەدى.
«قازاقستاندا ءقازىر ساياسي پارتيالاردى قۇرعان جانە قۇرۋعا دايىن، تىركەلۋ ۇستىندەگى، سايلاۋ ناۋقاندارىنا قاتىسۋ جوسپارى بار، بيلىك ءۇشىن كۇرەسۋ ىسىنە شىنداپ كىرىسىپ جۇرگەن ادامدار مەن بىرلەستىكتەر پايدا بولۋدا. پرەزيدەنت بۇگىندە بارلىق پارتيالاردان ءوزىن شەتتەدى. سوندىقتان رەفورمالاردى قولداۋعا ارنالعان قوعامدىق قوزعالىس قۇرۋ ءىسىن ءبىز رەفورمالارعا قاتىسۋ ءۇشىن نەعۇرلىم ءتيىمدى ءارى ىڭعايلى ۇيىم دەپ سانادىق. ءبىزدىڭ قاتارىمىزعا نيەت بىلدىرگەن بارلىق ازامات قوسىلا الادى. قازاقستانداعى وزگەرىستەردى جاقتايتىن ادامدار سانى باسىم بولادى دەپ سەنەمىز»، - دەدى باستاماشىل توپ وكىلدەرى.
قوزعالىس مۇشەلەرى ءاربىر قازاقستاندىقتىڭ رەفورمالاردىڭ ويداعىداي ىسكە اسۋىنا مۇددەلى ەكەنىن، سەبەبى ونىڭ ءاربىر كەزەڭىن ىسكە اسىرعان سايىن قاراپايىم ەل ازاماتتارىنىڭ ءال-اۋقاتى مەن ءومىر ءسۇرۋ دەڭگەيى كوتەرىلە تۇسەتىنىن اتاپ ءوتتى.
«كۇنى كەشەگى جولداۋدا پرەزيدەنت وسكەلەڭ ۇرپاقتى قولداۋعا باعىتتالعان الەۋمەتتىك-ەكونوميكالىق سيپاتتاعى ءبىرقاتار شارانى جاريالادى. اتاپ ايتقاندا، بالا تۋعاندا تولەنەتىن جاردەماقى مەرزىمىن ۇزارتۋ، ۇلتتىق قور تابىسىنىڭ ءبىر بولىگىن بارشا قازاقستاندىق بالالاردىڭ يگىلىگىنە جۇمساۋ، «سامۇرىق-قازىنانىڭ» تازا تابىسىنىڭ 7%-ىن «قازاقستان حالقى» قورىنا اۋدارۋ جانە ت.ب. بۇل قانشاما جىلدان بەرى ەلىمىزدىڭ ءاربىر ازاماتى ەندى عانا ناقتى سەزىنگەن كەلەشەك ۇرپاق يگىلىگىنە ارنالعان ينۆەستيسيا. بۇل باستامانىڭ العاشىندا حالىق اراسىندا ءبىراز ابىگەر تۋدىرعانى بەلگىلى. وسىنىڭ نەگىزىندە حالىق ءقازىر وسى باستامالاردىڭ بارلىعىنىڭ ناقتى ىسكە اسقانىن قالايدى. سوندىقتان ءبىز وسىلاردى اياعىنا دەيىن جەتكىزۋ ءۇشىن مەملەكەت باسشىسىنا مۇمكىندىك بەرىپ، جان-جاقتى قولداۋ كورسەتەمىز»، - دەپ اتاپ ءوتتى قوزعالىسقا قاتىسۋشىلار.