مەملەكەت باسشىسى قاسىم–جومارت توقايەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىمەن سەيسمولوگيا ينستيتۋتىنىڭ ۇجىمى دا جەتە تانىسىپ، تالقىلاۋدا.
پرەزيدەنتتىڭ ءوزى اتاپ وتكەنىندەي، ەلىمىز جاڭا كەزەڭگە قادام باسۋدا. جاڭا، ادىلەتتى قوعام قۇرۋ جولىندا ءبىرقاتار يگى شارالاردى جۇزەگە اسىرۋ قولعا الىنىپ جاتىر. جولداۋدىڭ اتالۋىنان دا ايقىن اڭعارىپ تۇرعانىمىزداي، ادىلەتتى مەملەكەت. ءبىرتۇتاس ۇلت. بەرەكەلى قوعام دەگەنىمىز قاستەرلى ۇشتاعان ۇعىمىن بىلدىرەدى. ياعني، حالقىمىز ادىلەتتى قوعامدا ءبىرتۇتاس ۇلت بولىپ، «ءبىر جاعادان باس، ءبىر جەڭنەن قول شىعارا» ەڭبەك ەتىپ ءومىر سۇرسە، ىرگەمىزدىڭ بەرىك بولاتىنى، الەۋمەتتىك-ەكونوميكالىق باعىتتا تالاي بيىك اسۋلار مەن تابىستارعا جەتەتىنىمىز ءسوزسىز. قازاقستانىمىز گۇلدەنىپ، وركەندەۋى ءۇشىن اركىم وزىنە تاپسىرىلعان ىسكە جوعارى جاۋاپكەرشىلىكپەن قاراپ، ساپالى ەڭبەك ەتۋىمەن ۇلەس قوسۋى قاجەت. سوندا عانا ەڭسەسى بيىك ەل بولامىز. حالىقتىڭ ءوزارا تاتۋ-بىرلىگى بەرەكەلى قوعامنىڭ بەرىك ىرگەتاسىن قالايدى.
قوعامىمىزدا شەشۋىن كۇتكەن كۇردەلى ماسەلەلەر از ەمەس. پرەزيدەنتىمىز جولداۋىندا العا باسۋىمىزدىڭ بەس باعدارىن جانە ونى جۇزەگە اسىرۋدىڭ جولدارىن دا اتاپ كورسەتتى. سونىڭ «جاڭا ەكونوميكالىق ساياسات» اتتى ءبىرىنشى باعدارىندا ماكروەكونوميكالىق تۇراقتىلىقتى قامتاماسىز ەتۋ، ەكونوميكانى ءارتاراپتاندىرۋ جانە سيفرلاندىرۋ، سونىمەن قاتار، شاعىن جانە ورتا بيزنەس پەن ادام كاپيتالىن دامىتۋ، زاڭ ۇستەمدىگىن ورناتۋ قاجەت ەكەنىن ءبىرىنشى كەزەكتە اتاپ ءوتۋى بەكەر ەمەس. بۇل ماسەلەلەر الدىڭعى كەزەكتە شەشىمىن تاپسا، دامۋدىڭ داڭعىل جولىنا تۇسەتىنىمىز ايقىن.
ينستيتۋتىمىز قازاقستان حالقىن جويقىن ءزىلزالادان ساقتاندىرۋ جانە ونىڭ الدىن الۋ باعىتىندا ىرگەتاسى 1976 جىلى قۇرىلعان ەلىمىزدەگى وسى باعىتتاعى بىرەگەي مەكەمە. بيىل جىل باسىنان باستاپ ق ر ءتجم-نىڭ قۇزىرىنا وتتىك. وسى كۇنى كەشە قوستاناي وبلىسىنىڭ ورماندى القابىن جانە ەلدىمەكەندەرىن شارپىعان الاپات ءورتتى سوندىرۋمەن العاشقى كەزەكتە توتەنشە جاعدايلار دەپارتامەنتتەرىنىڭ ۇجىمدارى ارپالىستى. ءتىپتى، بۇكىل ەل بولىپ ءتىلسىز جاۋمەن كۇرەستى. ءورت وراسان زور الەۋمەتتىك جانە ەكونوميكالىق ۇلكەن شىعىن اكەلدى. ماماندار ورتەنگەن ورماندى القاپتى قالپىنا كەلتىرۋ ءۇشىن كەم دەگەندە ەلۋ جىل قاجەت دەپ وتىر. بىزدەر ءبىرتۇتاس قوعامدا ءومىر ءسۇرىپ جاتقاندىقتان، مۇنداي جاعدايدا سىرت قالا المايمىز. ەل بولىپ، جۇرت بولىپ، كەزدەسكەن قيىندىقتار مەن توسىننان كەلگەن وسىنداي توسقاۋىلداردى جەڭىپ وتىرۋمىز قاجەت. ءبىرتۇتاس ۇلت دەگەنىمىزدىڭ ءبىر شەشىمى وسىنداي جاعدايدا كورىنىس تاپسا كەرەك. ينستيتۋت ۇجىمى ءبىر كۇندىك جالاقىلارىن قيىندىقتى باستارىنان كەشىپ جاتقان قوستانايلىقتارعا كومەك رەتىندە اۋدارۋعا شەشىم قابىلدادى.