الماتى قالاسى «وتباسى بانك» اق ديرەكتورى داناگۇل ءتۇسىپوۆا وڭىرلىك كوممۋنيكاسيالار قىزمەتىنىڭ بريفينگىنە قاتىستى. جۋرناليستەردىڭ سۇراقتارىنا جاۋاپ بەرۋ بارىسىندا ول تابىسى تومەن وتباسىلار قانداي يپوتەكانى الا الاتىنىن ايتتى، دەپ حابارلايدى almaty-akshamy.kz
«ەگەر ولار جەرگىلىكتى اتقارۋشى ورگاندار تاراپىنان باسپانا كەزەگىندە تۇرسا، «باقىتتى وتباسى» جانە «شاڭىراق» باعدارلامالارىنا قاتىسا الادى. بۇل باعدارلامالار ءۇشىن تولەم قابىلەتتىلىگىنەن ءوتۋدىڭ جەكە شارتتارى بار، مۇندا ءاربىر وتباسى مۇشەسىنىڭ شىعىندارى ازىراق سومادا ەسەپتەلەدى، سونداي-اق بۇل باعدارلامالار بويىنشا باستاپقى جارنا جەڭىلدەتىلگەن جانە ايتارلىقتاي تومەندەتىلگەن»، - دەدى داناگۇل ءتۇسىپوۆا.
سونىمەن بىرگە، سپيكەر «وتباسى بانك» ارقىلى جاستار ءۇشىن قانداي ءتيىمدى مەملەكەتتىك باعدارلامالار قولجەتىمدى ەكەنىن ايتتى.
«2017 جىلدان باستاپ قالامىزدا «الماتى جاستارى» جەڭىلدەتىلگەن باعدارلاماسى جۇزەگە اسىرىلۋدا. ول بارلىق وڭىرلەردە ايماقتىق باعدارلامالاردىڭ ىسكە قوسىلۋىنا نەگىز بولدى. «ەلوردا جاستارى»، «الاتاۋ جاستارى» باعدارلامالارى بار. مۇندا ءار ايماقتا نەسيە بەرۋ شارتتارى ءارتۇرلى. ماسەلەن، «الماتى جاستارى» باعدارلاماسى بويىنشا ءبىلىم، دەنساۋلىق ساقتاۋ، مادەنيەت، ب ا ق، سپورت، عىلىمي-زەرتتەۋ ينستيتۋتتارى، قۇقىق قورعاۋ ورگاندارى سياقتى جەتى سالادا ەڭبەك ەتىپ جۇرگەن 35 جاسقا دەيىنگى جاستارعا نەسيە بەرىلەدى. بيىلعى جىلعا وزگەرىستەر جوسپارلانىپ وتىر، ەندى اكىمدىكتىڭ ماقۇلداۋىن كۇتىپ وتىرمىز. باعدارلامانىڭ باستالعانىن كەيىن حابارلايمىز. ءبىز 1100 ازاماتقا نەسيە بەرۋدى جوسپارلاپ وتىرمىز، بۇل باعدارلاما بويىنشا باستاپقى جارنا - 10%، پايىزدىق مولشەرلەمەسى - 5»، - دەپ جالعاستىردى وكق سپيكەرى.
سونداي-اق داناگۇل ءتۇسىپوۆا «وتباسى بانك» بانكىندە دەپوزيت اشقاندا قىزمەتكەرلەر كەلىسىمشارت سوماسىن، ياعني كليەنتتىڭ بولاشاقتا تۇرمىس جاعدايىن جاقسارتۋ ءۇشىن پايدالانعىسى كەلەتىن سومانى انىقتايتىنىن ايتتى. ونىڭ ەڭ تومەنگى قۇنى 500 اەك، قازىرگى ۋاقىتتا 1 750 000 تەڭگە، ال ەڭ جوعارىسى 200 ميلليون تەڭگەگە دەيىن. كليەنت كەلىسىمشارت سوماسىنىڭ 50% جيناۋى كەرەك.