الماتى قالاسىندا الەۋمەتتىك ماڭىزى بار ازىق-تۇلىك (ءامات) باعاسىن تۇراقتاندىرۋ ماقساتىندا ءبىرقاتار شارالار قابىلداندى. قالا بيلىگى وتاندىق وندىرۋشىلەرمەن كەلىسىمشارتتار جاساپ، ماۋسىمارالىق كەزەڭدە كوكونىس باعاسىن رەتتەۋ تەتىكتەرىن ىسكە قوستى. بۇل تۋرالى Aqshamnews.kz سايتى حابارلايدى.
الماتىدا ازىق-تۇلىك باعاسىن ۇستاپ تۇرۋ ءۇشىن "فورۆاردتىق ساتىپ الۋ" جانە "اينالىم قارىزى" مەحانيزمدەرى ەنگىزىلدى. وسى شارالار اياسىندا وتاندىق وندىرۋشىلەرمەن تومەندەگى كولەمدە ءونىم جەتكىزۋ جونىندە كەلىسىم جاسالدى:
- 1 000 توننا كۇرىش – "Asyl Dan Trade" ج ش س
- 1 800 توننا تاۋىق ەتى – "الاتاۋ-قۇس" اق
- 170 توننا ءسۇت – "كوكشەتاۋ بەلوگورە ءسۇت زاۋىتى" ج ش س
- 86،4 ملن دانا جۇمىرتقا – "سارى-بۇلاق" اق
- 4 500 توننا قانت – "كوكسۋ قانت زاۋىتى" ج ش س
- 800 توننا تۇز – "التىن وردا" ج ش س
بۇل كەلىسىمدەر بەلگىلەنگەن باعا بويىنشا ءونىم جەتكىزۋگە مۇمكىندىك بەرەدى.
كوكونىس باعاسىن تۇراقتاندىرۋ ءۇشىن (كارتوپ، ءسابىز، پياز، قىرىققابات) پاۆلودار، الماتى، جامبىل جانە تۇركىستان وبلىستارىنىڭ شارۋالارىمەن 9 700 توننا ءونىمدى تومەندەتىلگەن باعامەن جەتكىزۋ جونىندە "فورۆاردتىق" كەلىسىمدەر جاسالدى. سونداي-اق، تۇركىستان، جامبىل جانە الماتى وبلىستارىنان ەرتە پىسەتىن كوكونىستەردى جەتكىزۋ ماسەلەسى قوسىمشا قاراستىرىلىپ جاتىر.
بۇل شارالار ماۋسىمارالىق كەزەڭدە كوكونىس باعاسىنىڭ قىمباتتاۋىن بولدىرماۋعا كومەكتەسەدى.
الەۋمەتتىك ماڭىزى بار ازىق-تۇلىك تاۋارلارىنىڭ 11 ءتۇرى بويىنشا Magnum ساۋدا جەلىسىمەن باعا بەلگىلەۋ جونىندە كەلىسىم جاسالدى. بۇل كەلىسىم حالىققا قاجەتتى تاۋارلاردى قولجەتىمدى باعامەن ۇسىنۋعا ىقپال ەتەدى.
ءامات باعاسىن باقىلاۋ جانە دەلدالداردىڭ باعاعا اسەرىن ازايتۋ ماقساتىندا وڭىرلىك كوميسسيا تۇراقتى مونيتورينگ جۇرگىزۋدە. ساۋدا نۇكتەلەرىمەن 15%-دىق ساۋدا ۇستەمەسىن ساقتاۋ جانە دەلدالدىق تىزبەكتى قىسقارتۋ جونىندە ءتۇسىندىرۋ جۇمىستارى قولعا الىندى.
جىل باسىنان بەرى:
- 5 رەت كوميسسيا وتىرىسى ءوتتى،
- 119 ەرەجە بۇزۋ فاكتىسى انىقتالدى،
- 113 اكىمشىلىك حاتتاما تولتىرىلدى،
- 6 ايىپپۇل سالىندى،
- 17 ءتيىمسىز دەلدال نارىقتان شىعارىلدى.
بۇل شارالار باعانىڭ نەگىزسىز وسۋىنە جول بەرمەۋگە باعىتتالعان.
قازىرگى ۋاقىتتا "اينالىم قارىزى" جانە "فورۆاردتىق" كەلىسىم اياسىندا قوسىمشا كەلىسىمشارتتار جاساۋ ماسەلەسى قاراستىرىلۋدا. ولار:
- جۇمىرتقا – "كوگەر LTD" ج ش س
- تاۋىق ەتى – "Otan Green Food" ج ش س
- كۇرىش – "قىزىلوردا قۇرىلىس" ج ش س
- كوكونىستەر – "وماروۆ" شق
الماتى قالاسى كاسىپكەرلىك جانە ينۆەستيسيالار باسقارماسى ازىق-تۇلىك قاۋىپسىزدىگىن قامتاماسىز ەتۋ جانە ءامات باعاسىن باقىلاۋ جۇمىستارىن تۇراقتى تۇردە جۇرگىزىپ كەلەدى. باعانىڭ تۇراقتىلىعىن ساقتاۋ ماقساتىندا جەرگىلىكتى بيلىك وندىرۋشىلەرمەن، ساۋدا جەلىلەرىمەن كەلىسسوزدەر جۇرگىزىپ، دەلدالدىقتى ازايتۋ جانە الەۋمەتتىك ازىق-تۇلىكتىڭ قىمباتتاۋىنا جول بەرمەۋ باعىتىندا كەشەندى شارالار اتقارۋدا.