الماتىدا تەرروريستىك ءقاۋىپتىڭ «قىزىل» دەڭگەيى جويىلدى

26 قاڭتاردا ساعات 00:00-دەن باستاپ قاۋىپتىلىكتىڭ جوعارى «قىزعىلت سارى» دەڭگەيى ەنگىزىلەدى.

تەرروريزمگە قارسى كۇرەس جونىندەگى قالالىق جەدەل شتاب الماتىداعى جاعدايدىڭ تۇراقتانعانى تۋرالى مالىمدەدى، دەپ حابارلايدى Almaty-akshamy.kz

«قالا اۋماعىندا قابىلدانعان قاۋلىعا سايكەس، 2022 جىلعى 26 قاڭتاردا ساعات 00:00-دەن باستاپ لاڭكەستىككە قارسى وپەراسيا رەجيمى توقتاتىلىپ، تەرروريستىك قاۋىپتىلىكتىڭ «قىزىل» دەڭگەيى جويىلدى»، - دەپ جازىلعان تەرروريزمگە قارسى كۇرەس جونىندەگى قالالىق جەدەل شتابتىڭ حابارلاماسىندا.

سول ۋاقىتتان باستاپ لاڭكەستىك قاۋىپتىلىكتىڭ جوعارى «قىزعىلت سارى» دەڭگەيى بەلگىلەنەدى.

ارنايى جاساق جانە قۇقىق قورعاۋ ورگاندارى تارتىپسىزدىكتەرگە قاتىسۋشىلار مەن ۇيىمداستىرۋشىلاردى انىقتاۋ بويىنشا جەدەل ىزدەستىرۋ شارالارىن جالعاستىرۋدا.

تەررورلىق ءقاۋىپتىڭ قازىرگى دەڭگەيىندە قۇقىق قورعاۋ ورگاندارىنا قارۋ-جاراق پەن جارىلعىش زاتتاردى تابۋ ماقساتىندا كولىك قۇرالدارىن تىنتۋگە رۇقسات ەتىلگەن.

الماتى تۇرعىندارىنان قۇقىق قورعاۋ ورگاندارىنىڭ جۇمىسىنا تۇسىنىستىكپەن قاراپ، شىدامدىلىق تانىتىپ، ولاردىڭ زاڭدى تالاپتارىن بۇلجىتپاي ورىنداۋ سۇرالادى.