الماتى قالاسىنىڭ ەكولوگيا جانە قورشاعان ورتا باسقارماسى تەرەڭدەتىلگەن ۇلگىدەگى قتق جيناۋعا ارنالعان كونتەينەرلەردى اۋىستىرۋ بويىنشا جۇمىستار جۇرگىزۋدە. بۇگىندە مەگاپوليستىڭ اۋەزوۆ، بوستاندىق، ناۋرىزباي اۋداندارىندا 214 جاڭا كونتەينەر ورناتىلدى، دەپ حابارلايدى almaty-akshamy.kz
3 تەكشە مەترلىك بۇل كونتەينەرلەر قولدانۋعا ىڭعايلى، ەستەتيكالىق كەلبەتكە يە، كەز كەلگەن كليماتقا بەيىمدەلگەن. تىعىز جابىلاتىن قاقپاقتىڭ ارقاسىندا جاڭبىر مەن قاردىڭ ىشكە ەنۋى، قالدىقتاردىڭ جيناقتالۋى، جاعىمسىز ءيىستىڭ تارالۋى مۇمكىن ەمەس. ەڭ باستىسى، مۇنداي ۋرنالارعا قۇستار مەن جانۋارلار جولامايدى.
ەسكە سالساق، الماتىدا تەرەڭدەتىلگەن كونتەينەرلەر العاش رەت 2012 جىلى ورناتىلدى. العاشقى ۇلگىلەر قورعانىش جابىنى جوق قارا مەتالدان جاسالدى. ۇزاق پايدالانۋ سالدارىنان مۇنداي كونتەينەرلەر كورروزياعا ۇشىرادى ءارى جايسىز جاعدايلاردىڭ بولۋى مۇمكىندىگىن تۋدىردى (قتق ءتۇسىرۋ كەزىندە قوقىس شىعاراتىن ۇيىمداردىڭ قىزمەتكەرلەرىنىڭ جاراقات الۋى، اۋلالاردىڭ سانيتارلىق جاعدايىنىڭ ناشارلاۋى جانە ت.ب.) جانە ولاردى اۋىستىرۋ قاجەت بولدى.