الماتى قالاسىندا «تازا قازاقستان» رەسپۋبليكالىق ەكولوگيالىق اكسياسى اياسىندا بوستاندىق اۋدانىندا سەنبىلىك ۇيىمداستىرىلدى. شاراعا قالا تۇرعىندارىنان بولەك، دەپۋتاتتار، وليمپيادا جۇلدەگەرلەرى، ەسترادا جۇلدىزدارى، بەلسەندى جاستار جانە اۋداندىق اكىمدىك وكىلدەرى قاتىستى، دەپ حابارلايدى aqshamnews.kz
سەنبىلىككە قاتىسۋشىلارعا قولعاپ، قوقىس پاكەتتەرى، كۇرەكتەر مەن سىپىرتقىلار تاراتىلىپ، ءبارى بىرلەسە قالا اۋماعىن تازارتۋ جۇمىستارىن جۇرگىزدى.
الماتى قالاسىنىڭ بوستاندىق اۋدانىنىڭ اكىمى سانجار الين دە قاتىسىپ، كوشە مەن الاڭدى بىرگە تازالادى. اكىم وسى شارا تۋرالى بىلاي دەدى:
— «تازا قازاقستان» اكسياسى اياسىندا قالا تۇرعىندارىنا تازالىقتىڭ ماڭىزدىلىعىن ءتۇسىندىرۋ ءۇشىن وسىنداي سەنبىلىكتەر وتكىزۋدەمىز. ءبىزدىڭ اۋدانىمىزدا ءقازىر 5 مەردىگەر ۇيىم جۇمىس ىستەپ جاتىر، ءبىراق كەيبىر جاعدايلاردا قىزمەت كورسەتۋ ساپاسى سىن كوتەرمەيدى. ءبىز بارلىق ماسەلەلەر بويىنشا تۇراقتى باقىلاۋ جۇرگىزەمىز، قاجەت بولسا، قاتاڭ شارالار قابىلدايمىز. بۇگىنگى سەنبىلىك — ءبارىمىز ءۇشىن جاقسى مۇمكىندىك، تابيعاتتى قورعاۋعا بىرلەسىپ ۇلەس قوسۋىمىز قاجەت، — دەپ اتاپ ءوتتى ول.
شاراعا قاتىسقان دەپۋتات يسلام بايرامۋكوۆ تازالىقتىڭ ءار ادامعا ماڭىزدى ەكەندىگىن، الماتىنىڭ تازالىعىن ساقتاۋ ءۇشىن جاستار مەن قالا تۇرعىندارىنىڭ بىرىگىپ ارەكەت ەتۋ كەرەكتىگىن ايتتى:
— الماتىنىڭ تازالىعى مەن ەكولوگياسى ءارقايسىمىزعا بايلانىستى. وسى ءىس-شارانى قولداۋ ارقىلى ءبىز جاستاردى وسى باعىتتا تاربيەلەپ، كەلەشەكتە بارشا تۇرعىنداردىڭ جاۋاپكەرشىلىگىن ارتتىرا الامىز، — دەدى دەپۋتات.
تازالىققا ارنالعان شاراعا تانىمال قازاقستاندىق ەسترادا جۇلدىزدارى دا كەلىپ، قوعامدىق اكسياعا قولداۋ كورسەتتى. قازاقستاندىق ءانشى وكتەم التايەۆ قالا تۇرعىندارىن تازالىقتى ساقتاۋعا جانە بۇل اكسياعا قوسىلۋعا شاقىردى:
— «تازا قازاقستان» اكسياسى اياسىندا ءبىز دە بۇل جەردى تازالاپ ءجۇرمىز. ءبىراق، وكىنىشكە وراي، مۇندا تازالىقتى ساقتاۋ قيىن بولىپ تۇر. ماسەلەن، قالانىڭ ورتالىعى بولا تۇرا، ادامدار ءالى دە قوقىس تاستايدى. بۇل وتە وكىنىشتى. بارشا الماتىلىقتاردى تازالىققا بەيجاي قاراماۋعا شاقىرامىن، — دەدى ءانشى.
سونىمەن قاتار، پاريج-2024 وليمپياداسىنىڭ قولا جۇلدەگەرلەرى يسلام ساتپايەۆ پەن الەكساندرا لي دە اكسياعا قاتىسىپ، تازالىقتىڭ ماڭىزدىلىعىنا توقتالدى. يسلام ساتپايەۆ ءوزىنىڭ پىكىرىندە:
— ءبىزدىڭ مىندەتىمىز — قالامىزدى تازا ۇستاۋ. وسى شاراعا قاتىسا وتىرىپ، ءبىز تەك ءوزىمىزدى عانا ەمەس، بارلىق قالا تۇرعىندارىن دا ەكولوگيالىق مادەنيەتتى بولۋعا شاقىرامىز. تازالىق ءار ادامنىڭ قولىندا، — دەدى ول.
الەكساندرا لي ءوز كەزەگىندە:
— بۇل ءىس-شارا ءبىز ءۇشىن وتە ماڭىزدى. تازالىق — ءبىزدىڭ ورتاق جاۋاپكەرشىلىگىمىز. اركىم ءوز ءۇيىنىڭ ماڭايىن تازا ۇستاۋى قاجەت. وسىنداي اكسيالار ارقىلى ءبىز قورشاعان ورتاعا دەگەن قۇرمەتىمىزدى كورسەتەمىز، — دەپ ءسوزىن قورىتىندىلادى.
جاستار مەن ەكولوگيالىق قوزعالىس بەلسەندىلەرى دە بۇل شارادا بەلسەندىلىك تانىتتى. «ەكو-رەيندجەرلەر» قوزعالىسىنىڭ وكىلدەرى بەيبيت جاسۇلان ۇلىنىڭ ايتۋىنشا، قالادا جىل باسىنان بەرى 200-دەن استام ەكولوگيالىق اكسيا وتكىزىلگەن. ولار قوقىس جيناۋدان باستاپ، ەكولوگيالىق لەكسيالار مەن رەسۋرستاردى قايتا وڭدەۋگە دەيىن ءارتۇرلى ءىس-شارالاردى ۇيىمداستىرادى.
بۇل شارا الماتىنىڭ تازا ءارى جاسىل قالاسىن ساقتاپ قالۋعا ۇلەس قوسۋعا شاقىرعان بارلىق قالا تۇرعىندارى ءۇشىن ۇلكەن مۇمكىندىك بولدى. «تازا قازاقستان» اكسياسى ەلدىڭ ءار وڭىرىندە ءوتىپ، تۇرعىنداردىڭ ەكولوگيالىق مادەنيەتىن ارتتىرۋعا باعىتتالعان.