الماتى قالاسىندا ستۋدەنتتەر اراسىندا «قازاق كۇرەسى» بويىنشا تۋرنير ءوتتى.
بۇل شارا قازاقستاننىڭ پاتريوتى، جەلتوكسان وقيعاسىنا قاتىسۋشى ەربول سىپاتايەۆتىڭ 60 جىلدىعىنا ارنالدى. سپورتتىق شارا «سسكا» سپورت كەشەنىندە ۇيىمداستىرىلىپ، وعان قالاداعى 20-دان استام وقۋ ورنىنىڭ ستۋدەنتتەرى قاتىستى، دەپ حابارلايدى aqshamnews.kz
ءتۋرنيردىڭ ۇيىمداستىرۋشىلارىنىڭ ايتۋىنشا، بۇل ءىس-شارا قازاقستاننىڭ ۇلتتىق داستۇرلەرىن ساقتاپ، مادەني مۇراسىن دارىپتەۋگە ۇلكەن ىقپال ەتپەك.
«قازاق كۇرەسى» ءتۋرنيرى تەك سپورتتىق جارىس قانا ەمەس، ول ەربول سىپاتايەۆ سىندى ۇلت ماقتانىشى بولعان تۇلعانىڭ ەرلىگى مەن ءپاتريوتيزمىن جاستارعا ۇلگى ەتۋ ماقساتىن دا كوزدەيدى. مۇنداي ءىس-شارالار جاستاردىڭ بويىندا ۇلتتىق رۋحتى قالىپتاستىرىپ، ولاردىڭ بويىندا پاتريوتتىق سەزىمدى نىعايتۋعا زور ىقپال ەتەدى، — دەدى حالىقارالىق قوعامدىق «جاناشىر» قورىنىڭ باسشىسى جانىل اپەتوۆا.
تۋرنير بارىسىندا قاتىسۋشىلار كۇش سىناسىپ، ءوز شەبەرلىكتەرىن كورسەتىپ، قازاق كۇرەسىنىڭ ءداستۇرىن ساقتاۋعا جانە ونى دامىتۋعا ۇلكەن ۇلەس قوستى. بارلىعى 200-دەن استام ستۋدەنت جارىسقا قاتىسىپ، 3 سالماق دارەجەسىندە ۇزدىكتەر انىقتالدى. ءاربىر جەكپە-جەك وتە تارتىستى ءوتتى، ال كورەرمەندەر قىزىعۋشىلىقپەن ءارتۇرلى شايقاستاردى تاماشالادى. جارىسقا قاتىسۋشىلار وزدەرىنىڭ فيزيكالىق مۇمكىندىكتەرى مەن كۇش-جىگەرىن سىناپ، جەڭىسكە دەگەن ۇمتىلىستارىن كورسەتتى.
جارىس ناتيجەسىندە جەڭىمپازدار ارنايى مەدالدارمەن جانە ەستەلىك سىيلىقتارمەن ماراپاتتالدى. ال، جۇلدەگەرلەر قاتارىنا كىرمەگەن، ءبىراق جارىسقا بەلسەنە قاتىسقان بارلىق قاتىسۋشىلارعا العىس حاتتار مەن كىشكەنتاي سىيلىقتار تابىس ەتىلدى.
ءتۋرنيردىڭ قۇرمەتتى قوناقتارى رەتىندە ەربول سىپاتايەۆتىڭ سىنىپتاستارى، اۋىلداستارى، جاقىندارى مەن سوڭعى ۋاقىتتارىندا بىرگە بولعان دوستارى قاتىستى. سونداي-اق، جەلتوقسانشىلار ۇيىمىنىڭ جەتەكشىلەرى دە شاراعا قاتىسىپ، ەربول سىپاتايەۆتىڭ ەسىمىن ماڭگىلىككە ۇلىقتاۋ ماقساتىندا ءسوز سويلەدى.
بۇل ماڭىزدى شارانى ۇيىمداستىرۋشى — حالىقارالىق قوعامدىق «جاناشىر» قورى الماتى قالاسىنىڭ قوعامدىق دامۋ باسقارماسىنىڭ قولداۋىمەن وتكىزدى.