الماتى قالاسىندا ارميان مادەنيەتى مەن داستۇرلەرىن ناسيحاتتايتىن ەتنيكالىق فەستيۆال ءوتتى.
بۇل شارا ەتنومادەني ورتالىق «لۋيس» ۇيىمداستىرعان، جانە وعان ءارتۇرلى ۇلتتار مەن ەتنيكالىق توپتار وكىلدەرى قاتىستى. فەستيۆالدە ارميان حالقىنىڭ باي مادەنيەتى مەن تاريحى، داستۇرلەرى تولىققاندى كورسەتىلدى، دەپ حابارلايدى aqshamnews.kz
«ارمياندار — وتە كونە حالىق. ءبىز مۇنىمەن ماقتانامىز. ءبىزدىڭ جازۋىمىز وتە ەرتە پايدا بولعان جانە بۇگىنگى كۇنگە دەيىن ەشبىر ءارىپ وزگەرمەگەن. ءبىز ءوزىمىزدىڭ داستۇرلەرىمىز بەن ادەت-عۇرىپتارىمىزدى ماقتانىشپەن كورسەتەمىز، ءارتۇرلى ۇلت وكىلدەرىن قوناققا قابىلدايمىز. قازاقستاندا ءبىز ۇلكەن ءبىر وتباسىمىز، الايدا ءوزىمىزدىڭ ۇلتتىق ەرەكشەلىكتەرىمىزدى ساقتاي وتىرىپ ءومىر ءسۇرىپ كەلەمىز»، — دەدى ارميان ەتنو-مادەني ورتالىعىنىڭ قۇرمەتتى ءتوراعاسى، بەلگىلى كاسىپكەر ارتۋش كاراپەتيان.
فەستيۆالعا قازاقتاردان بولەك، ورىستار، بەلورۋستار، گرەكتەر، كورەيلەر جانە باسقا دا ۇلتتار قاتىستى. الماتى قالاسىنداعى قازاقستان حالىقتارى اسسامبلەياسى ءتوراعاسىنىڭ ورىنباسارى، ورىس مادەنيەت ورتالىعىنىڭ جەتەكشىسى ۆسيەۆولود لۋكاشيەۆ فەستيۆالدىڭ ماڭىزدىلىعىن اتاپ ءوتىپ، ونىڭ بارلىق قازاقستاندىقتاردى بىرىكتىرەتىن ۇلكەن وقيعا ەكەنىن ايتتى:
«ءبىز بۇگىن مۇندا بارلىعىمىز بىر-بىرىمىزبەن بىرگە مەرەكەدەن ءلاززات الۋ ءۇشىن جينالدىق. الداعى جىلى قازاقستان حالىقتارى اسسامبلەياسىنىڭ 30 جىلدىعىن اتاپ وتەمىز، بۇل ۇيىم ءبىزدى ءبارىمىزدى بىرىكتىردى»، — دەدى ول.
بەلارۋس ەتنو-مادەني ورتالىعىنىڭ ءتوراعاسى يرينا كوستينا ارميان دياسپوراسىنىڭ قازاقستاننىڭ دامۋىنا قوسقان ۇلەسىنىڭ زور ەكەنىن اتاپ ءوتتى. ول ارتۋش مەسروپوۆيچتىڭ ەلىمىزدىڭ تاۋەلسىزدىگىنىڭ العاشقى جىلدارىندا كاسىپورىنداردى قولداۋعا ۇلكەن كومەك كورسەتكەنىن جانە بۇگىندە دە ونەر جانە مادەنيەت وكىلدەرىنە قولداۋ كورسەتىپ جاتقانىن ەرەكشە اتاپ ءوتتى.
گرەك ەتنو-مادەني ورتالىعىنىڭ ءتوراعاسى گەورگيي يوردانيدي ارمياندار مەن گرەكتەردىڭ تاريحىندا ورتاق كوپ نارسە بار ەكەنىن، ولاردى قازاقستاندا بىرىكتىرگەن ورتاق تاعدىر مەن جەر ەكەنىن ايتتى.
فەستيۆال قوناقتارى ارميان مادەنيەتىنىڭ كورمەسىن، تانىمال ارميان كلارنەتشىسى، حالىق مۋزىكانتى ۆرام ميناسياننىڭ جانە «نايري» شىعارماشىلىق ءانسامبلىنىڭ جارقىن ونەر كورسەتۋلەرىن تاماشالادى. «نايري» ءانسامبلى ءارتۇرلى ۇلت وكىلدەرىنىڭ ونەرلەرىن بىرىكتىرىپ، كوپۇلتتى دوستىقتىڭ سيمۆولى بولىپ تابىلادى.
فەستيۆالدىڭ ماڭىزدى ساتتەرىنىڭ ءبىرى — رۋبەن كازارياننىڭ جاڭا دەرەكتى ءفيلمىنىڭ كورسەتىلىمى بولدى. ءفيلمنىڭ باستى كەيىپكەرى — بالالار سەرەبرالدى سال اۋرۋى دياگنوزى قويىلعان ءجاسوسپىرىم، ول ەرەكشە بالالارعا ارنالعان ەلەكتروساموكات ويلاپ تاپقان. رەجيسسەردىڭ ايتۋىنشا، بۇل فيلم ونىڭ الەۋمەتتىك جوبالارىنىڭ ءبىر بولىگى بولىپ تابىلادى.
«مەنىڭ فيلمىمدە باستى كەيىپكەر ەلداردىڭ اناسى ۇلىنىڭ دامۋىندا بار مۇمكىندىكتەردى پايدالانادى. ول بالالار سەرەبرالدى سال اۋرۋىمەن اۋىرادى، ءبىراق ومىردە بەلسەندى بولۋعا تىرىسادى جانە باسقا ادامدارعا ۇلگى كورسەتەدى»، — دەدى رەجيسسەر.
فەستيۆال الماتى تۇرعىندارىنا كوپتەگەن جارقىن اسەرلەر سىيلاپ، كوپۇلتتى قازاقستاننىڭ مادەنيەتىن پاش ەتتى.