ەكونورمانى بۇزعان جۇرگىزۋشىگە ەسكەرتۋ نەمەسە 10 اەك (30 630 تەڭگە) كولەمىندە ايىپپۇل سالادى.
قالالىق ەكولوگيا جانە قورشاعان ورتانى قورعاۋ باسقارماسى اۆتوكولىك قۇرالدارىنان شىعاتىن زيان زاتتاردى ولشەۋ ەرەجەسىن ازىرلەدى، دەپ حابارلايدى Almaty-akshamy.kz
ەرەجەدە الماتى قالاسىنداعى ستاسيونارلىق جانە جىلجىمالى ەكولوگيالىق پوستتاردىڭ تولىققاندى جۇمىس ىستەۋى ءۇشىن قاجەت جۇمىستىڭ تولىق كەشەنى، سونىمەن قاتار اۆتوكولىك قۇرالدارىنىڭ پايدالانىلعان گازىنداعى رەتتەلەتىن لاستاۋشى زاتتاردىڭ تىزبەسى قامتىلعان. ستاسيونارلىق ەكولوگيالىق بەكەتتەر جىل بويىنا تاۋلىك بويى ۇزدىكسىز جۇمىس ىستەيدى.
ستاسيونارلىق جانە جىلجىمالى پوستتاردا ولشەنەتىن كولىكتەردىڭ سانى كۇنىنە كەمىندە 500 بىرلىك بولادى دەپ جوسپارلانىپ وتىر. اتاپ ايتقاندا، پايدالانىلعان گاز ولشەنەدى.
اۆتوكولىك قۇرالدارىن توقتاتۋدىڭ باسىمدىلىعى:
الماتى قالاسى پوليسيا دەپارتامەنتىنىڭ جەدەل باعىتى؛
ۋاكىلەتتى ورگاننىڭ حابارلاماسى؛
جول باقىلاۋ كامەرالارىمەن، ونىڭ ىشىندە سەرگەك جۇيەسىمەن بەرىلگەن دەرەكتەر؛
اۆتوكولىك قۇرالدارىن ۆيزۋالدى باقىلاۋ (سىرتقى ءتۇرى) بويىنشا؛
جولدان سىناما الۋ.
ەرەجەگە سايكەس، پوليسيا قىزمەتكەرى تاياقشامەن اۆتوكولىكتى توقتاتادى. كولىكتى توقتاتقاننان كەيىن جۇرگىزۋشىگە جاقىنداپ، ءوزىن تانىستىرىپ، توقتاۋ سەبەبىن تۇسىندىرەدى.
ءوز كەزەگىندە ەسەپكە الۋ مامانى پايدالانىلعان گازداردى ولشەيدى جانە الىنعان مالىمەتتەر نەگىزىندە اۆتوماتتى تۇردە ەلەكتروندى ولشەۋ حاتتاماسىن جاسايدى جانە ونى ساقتاۋ ءۇشىن دەرەكتەر بازاسىنا بەرەدى. كولىك ەكولوگيالىق ستاندارتتارعا ساي بولسا، جۇرگىزۋشى قوزعالىسىن جالعاستىرادى.
پايدالانىلعان گازداردىڭ ەكولوگيالىق نورماسىنان اسىپ كەتكەنى باستاپقى انىقتالعان كەزدە پوليسيا قىزمەتكەرى جۇرگىزۋشىگە ەسكەرتۋ نەمەسە 10 اەك (30 630 تەڭگە) كولەمىندە ايىپپۇل سالادى.
وسىدان كەيىن جۇرگىزۋشى 10 جۇمىس كۇنىندە كولىكتى ەكولوگيالىق نورمالارعا سايكەستەندىرىپ، باقىلاۋ ولشەۋى ءۇشىن ەكولوگيالىق بەكەتكە كەلۋى كەرەك. پايدالانىلعان گازدىڭ ەكولوگيالىق نورماسىنان بىرنەشە رەت اسىپ كەتۋى انىقتالسا، جۇرگىزۋشىگە 20 اەك (61 260 تەڭگە) كولەمىندە ايىپپۇل سالىنادى.
بۇل رەتتە اقاۋى بار كولىك ايىپپۇل تولەنگەنگە دەيىن قاماۋ الاڭىنا جىبەرىلەدى، ايىپپۇل تولەنگەننەن كەيىن جۇرگىزۋشىگە كولىكتى قالىپتى جاعدايعا كەلتىرۋ ءۇشىن 10 جۇمىس كۇنى بەرىلەدى.
ستاسيونارلىق ەكولوگيالىق پوستتار بيىكتىگى كەمىندە 4،5 مەتر جانە ۇزىندىعى 2،5 مەتر شاتىرمەن، جۇمىس بولمەسىمەن، كومپيۋتەرلەر، بەينەباقىلاۋ جۇيەلەرى جيھازدار، تۇرمىستىق بولمە، ۆاننا، جۇمىس بولمەسى، سىرتقى جانە ىشكى جارىقتاندىرۋمەن، كونديسيونەرلەرمەن، جىلىتۋ جۇيەلەرىمەن جابدىقتالۋى كەرەك.
ەرەجە سونىمەن قاتار اۆتوكولىكتىڭ پايدالانعان گازىن ولشەۋ ادىستەمەسىن جانە تەحنيكالىق تالاپتاردى انىقتايدى. قۇجات 23 تامىزعا دەيىن قوعامدىق تالقىلاۋ ءۇشىن اشىق نقا ۆەب-سايتىندا جاريالانعان.