الماتى وبلىسىندا قازا تاپقان جاۋىنگەر ناگراداعا ۇسىنىلدى

بۇدان بۇرىن ۇلتتىق گۆارديا ساربازىنىڭ قازا بولعانىن حابارلاعانبىز.

الماتى وبلىسىندا قاتتى داۋىل كەزىندە قازا تاپقان قاتارداعى جاۋىنگەر الماس شاحيموۆ مەملەكەتتىك ناگراداعا ۇسىنىلدى، دەپ حابارلايدى Almaty-akshamy.kz

دالالىق وقۋ-جاتتىعۋ كەزىندە قازا تاپقان جاۋىنگەردى ماراپاتتاۋ تۋرالى ۇسىنىس باس قولباسشىلىققا جىبەرىلگەن. قاي ناگرادامەن ماراپاتتالاتىنى شەشىلەدى.

مارقۇمنىڭ دەنەسى تۋعان جەرى - كوكشەتاۋ قالاسىنا جىبەرىلەدى. ال وتباسىنا ماتەريالدىق كومەك كورسەتىلەدى.

ايتا كەتەرى، 5571 اسكەري ءبولىمىنىڭ جاۋىنگەرلىك دايارلىق جوسپارىنا سايكەس، جەدەل ماقساتتاعى 1-باتالوننىڭ جەكە قۇرامى 8-13 تامىز ارالىعىندا دالالىق وقۋ-جاتتىعۋعا شىققان.

9 تامىزدا ساعات 20.55 شاماسىندا قاتتى داۋىل باستالىپ، جەل سوعىپ، تىگىلگەن شاتىرلار قيراي باستاعان. قاتارداعى جاۋىنگەر الماس شاحيموۆ ارىپتەستەرىن ءقاۋىپسىز جەرگە ەۆاكۋاسيالاۋعا كومەكتەسىپ جۇرگەن. سول كەزدە شاتىردىڭ مەتالل جاقتاۋىنا باسىن سوعىپ، جاراقات العان. وعان مەديسينالىق كومەك كورسەتىلىپ، جاۋىنگەر قونايەۆ قالاسىنداعى اۋرۋحاناعا جەتكىزىلگەن. ءبىراق اۋرۋحانادا قايتىس بولدى.

«ءوزىنىڭ جانقيارلىق ىس-ارەكەتتەرىمەن قاتارداعى جاۋىنگەر ا.ن.شاحيموۆ جولداستارىن قۇتقارىپ قالدى. الايدا ءوزى باسىنان اۋىر جاراقات الدى»، - دەلىنگەن رەسمي حابارلامادا.

وقيعانىڭ ءمان-جايى انىقتالۋدا، قىزمەتتىك تەرگەۋ باستالدى. داۋىل كەزىندە تاعى 14 اسكەري جاراقات العان. قازىرگى كەزدە بارلىعى ساپقا قايتا ورالعان.